პოლიტიკა
ფარდულის დემონტაჟის გადაწყვეტილება მიიღეს ადგილობრივმა მცხოვრებლებმა გამოძიებისგან დამოუკიდებლად - კახა სირაძე
შინაგან საქმეთა სამინისტროს წარმომადგენელი კახა სირაძე ხორავას ქუჩაზე მოზარდების მკვლელობის საქმის დეტალებზე საუბრობს აღნიშნული საქმის შემსწავლელი დროებითი საპარლამენტო საგამოძიებო კომისიის სხდომაზე. კომისიის მდივანმა ოთარ კახიძემ შსს-ის თანამშრომელს კითხვა დაუსვა, რატომ მოხდა იმ ფარდულის დემონტაჟი, სადაც დავით სარალიძემ სასიკვდილო ჭრილობები მიიღო და რატომ არ დაილუქა ის.
ამაზე სირაძემ უპასუხა, რომ ფარდულის დემონტაჟი მოხდა მას შემდეგ, რაც იქ საგამოძიებო ექსპერიმენტები ჩატარდა. შსს-ის თანამშრომლის განმარტებით, გადაწყვეტილება ობიექტის დემონტაჟის შესახებ ადგილობრივმა მოსახლეობამ მიიღო გამოძიებისგან დამოუკიდებლად.
„მოგეხსენებათ, რომ შემთხვევის ადგილი დაცულია იქამდე, ვიდრე შემთხვევის ადგილი თვალიერდება. დამთავრდა შემთხვევის ადგილის დათვალიერება, ამოღებული იყო ყველა შესაძლო კვალი, საგანი. გადაღებული იყო 400-მდე ფოტო. დემონტაჟი მოხდა მას შემდეგ, რაც რამდენიმე საგამოძიებო ექსპერიმენტი ჩატარდა. ფარდულის დემონტაჟის გადაწყვეტილება მიიღეს ადგილობრივმა მცხოვრებლებმა, ჩვენგან დამოუკიდებლად. საქმის კურსში არ ჩაუყენებივართ“, - აღნიშნა სირაძემ.
ცნობისთვის, სირაძის გარდა კომისიის კითხვებს პასუხობს საქმის პროკურორი ზვიად ფხაკაძე.