საზოგადოება

ფაროსანა ოკუპირებული აფხაზეთიდან შემოვიდა - ლევან დავითაშვილი

საქართველოს სოფლის მეურნეობის მინისტრის ლევან დავითაშვილის განცხადებით, დადასტურებულია, რომ ფაროსანა ოკუპირებული აფხაზეთიდან შემოვიდა.

მინისტრის თქმით, მდგომარეობას ართულებს ის, რომ ქართულ მხარეს არ აქვს შესაძლებლობა აფხაზეთში სამუშაოები გაწიოს, ოკუპირებულ ტერიტორიაზე კი, ფაროსანასთან ბრძოლა არ მიმდინარეობს.

„სოფლის მეურნეობის სამინისტროს აქვს მომზადებული სტრატეგია დაფუძნებული ზუსტად იმ ინფორმაციაზე, რაც ჩვენ დაგვიგროვდა წლის განმავლობაში მავნებელთან დაკავშირებით. მინდა გითხრათ, რომ ის რჩევები, რაც ჩვენ მივიღეთ წამყვანი ექსპერტებისგან ბოლომდე 100%-ით რა თქმა უნდა, ვერ იყო თანხვედრაში იმ ბიოლოგიასთან, რაც მავნებელმა გამოაჩინა საქართველოს კლიმატში და პირობებში“,-აღნიშნა მინისტრმა.

მისი თქმით, შედეგებს უნდა მივაღწიოთ ერთობლივი ბრძოლით.

„ჩვენი მოწოდებაც იყო, რომ ერთად უნდა დავამარცხოთ ფაროსანა. იმიტომ რომ ამ გამოწვევის მასშტაბი იმდენად დიდია, იმდენად დიდი და კომპლექსურია ამ მავნებლის გავრცელება, რომ თუ მხოლოდ ჩვენ ჩავატარებთ რაღაც ღონისძიებებს და ფერმერების ნაწილი ჩაატარებს და რომელიმე ნაწილი მაინც არ ჩაატარებს ღონისძიებებს - ჩავთვალოთ, რომ ფუჭია, ან ნაკლებად ეფექტიანია ჩვენი ღონისძიებებიც და დანარჩენი ფერმერების ძალისხმევაც“,-განმარტა ლევან დავითაშვილმა.

მონიკა დავლიანიძე