პოლიტიკა
ფრაქცია „კონსერვატორებმა“ საპარლამენტო უმრავლესობა დატოვეს
საპარლამენტო ფრაქცია „კონსერვატორებმა“ საპარლამენტო უმრავლესობა დატოვეს, – ამის შესახებ „კონსერვატიული პარტიის“ წევრმა, ზვიად ძიძგურმა განაცხადა.
როგორც ზვიად ძიძიგურმა აღნიშნა, „კონსერვატორები“ ყოველთვის იდგნენ გუნდის გვერდით, როცა ეს გუნდს სჭირდებოდა.
„მინდა, განვაცხადო იმათ გასაგონად, ვინც ამბობს, რომ ჩვენ გუნდი მივატოვეთ, როცა გუნდს ვჭირდებოდით. ეს გადაწყვეტილება მიგვაღებინა იმ დეპუტატებმა, რომლებმაც უარი განაცხადეს, მხარი დაეჭირათ საკონსტიტუციო ცვლილებებისთვის.
„კონსერვატორებს“ არასდროს გვიღალატია გუნდური თამაშის პრინციპებისთვის. არ ვაპირებთ, დავრჩეთ იქ, სადაც იღებენ ისეთ გადაწყვეტილებას, რომელიც პოლიტიკური და მორალური თვალსაზრისით არის გაუმართლებელი. ამას იმიტომ ვამბობ, რომ რბილი სიტყვა შევარჩიო, თუმცა სხვა სიტყვაც მადგება პირზე“, – განაცხადა ზვიად ძიძიგურმა.
ფრაქცია „ქართული ოცნება – კონსერვატორების“ წევრები არიან: გიგა ბუკია – ფრაქციის თავმჯდომარე; მუხრან ვახტანგაძე – ფრაქციის თავმჯდომარის მოადგილე; რულსან გაჯიევი – ფრაქციის მდივანი; ნინო გოგუაძე – ფრაქციის წევრი; პაატა კვიჟინაძე – ფრაქციის წევრი; ზვიად ძიძიგური – ფრაქციის წევრი.