პოლიტიკა
გედევან ფოფხაძის გარდა, შესაძლოა, უმრავლესობა კიდევ რამდენიმე დეპუტატმა დატოვოს - „რუსთავი 2“ გუნდში არსებულ დაპირისპირებაზე
მმართველ გუნდს გედევან ფოფხაძესთან ერთად, შესაძლოა, კიდევ 3-მა დეპუტატმა დატოვოს. ამის შესახებ ინფორმაციას „რუსთავი 2“ ავრცელებს.
როგორც წყარომ „კურიერს“ უთხრა, გუნდში დაპირისპირებაა უმრავლესობის რამდენიმე დეპუტატსა და პარლამენტის თავმდჯომარეს, ირაკლი კობახიძეს შორის. მიღებული ინფორმაციით, მმართველი გუნდის სტაჟიანი წევრები უკმაყოფილო არიან მათი უკანა პლანზე გადაწევით და უმრავლესობის „ახალი სახეების“ პრივილეგიებს დაუმსახურებლად მიიჩნევენ. ერთ-ერთი დაპირისპირების დროს მათ კობახიძეს გამოცდილება დაუწუნეს და კონსულტაციის გავლა მამასთან ურჩიეს.
უკმაყოფილო დეპუტატები შექმნილი დაძაბულობის მოსაგვარებლად კობახიძის გადადგომას მოითხოვენ, წინააღმდეგ შემთხვევაში პარლამენტში მისი იმპიჩმენტის საკითხს დააყენებენ.
„რუსთავი 2“-ის ინფორმაციით, უმრავლესობას, სავარაუდოდ, ეკა ბესელიაც დატოვებს, თუმცა იურიდიულ საკითხთა საპარლამენტო კომიტეტის თავმდჯომარემ ეს უარყო. დეპუტატის თქმით, ის „ქართული ოცნების“ შექმნაში იღებდა მონაწილეობას და გუნდს არ დატოვებს.
„რა უნდა დავტოვო გუნდი, პარტია, რომელიც პირველივე დღიდან ბიძინა ივანიშვილთან ერთად, მათ შორის ჩემი მონაწილეობით შეიქმნა?! მე ორგანულად ვარ დაკავშირებული ამ პარტიასთან პირველივე დღიდან“, -თქვა ბესელიამ.
„კურიერის“ ცნობით, არაა გამორიცხული, რომ მმართველი გუნდის ნაწილმა დაიწყოს კონსულტაციები პრეზიდენტთან, რათა გიორგი მარგველაშვილმა საპრეზიდენტო არჩევნებთან ერთად რიგგარეშე საპარლამენტო არჩევნებიც დანიშნოს.
ამ დროისთვის ცნობილია, რომ მმართველ გუნდს გედევან ფოფხაძე ტოვებს. გუშინ პარლამენტმა საზოგადოებრივი მაუწყებლის სამეურვეო საბჭოს წევრად უმცირესობის კვოტით წარდგენილი ნინია კაკაბაძე აირჩია, რასაც ფოფხაძემ გააპროტესტა. ამის გამო დეპუტატმა უმრავლესობიდან წასვლის გადაწყვეტილება მიიღო.