პოლიტიკა
„ღირსეული პარტნიორი“ ძალიან მნიშვნელოვანია ჩვენს რეგიონში სტაბილურობის განმტკიცებისთვის - გიორგი კვირიკაშვილი
სამხედრო სწავლება - „ღირსეული პარტნიორი“ ძალიან მნიშვნელოვანია ჩვენს რეგიონში სტაბილურობის განმტკიცებისთვის, - განაცხადა პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე.
როგორც მთავრობის მეთაურმა აღნიშნა, რამდენიმე დღეში იწყება მრავალმხრივი სამხედრო სწავლება - „ღირსეული პარტნიორი“, რომელშიც მონაწილეობენ ჩვენი პარტნიორი ქვეყნების შეიარაღებული ძალების წარმომადგენლები.
„ვფიქრობთ, რომ ეს სწავლება არის ძალიან მნიშვნელოვანი ჩვენს რეგიონში სტაბილურობის განმტკიცებისთვის. მასში აშშ-ის, დიდი ბრიტანეთის და სხვა პარტნიორი ქვეყნების წარმომადგენლები მიიღებენ მონაწილეობას. თუ არ ვცდები, უკვე მესამედ იმართება ასეთი ტიპის სწავლება და ესეც ნამდვილად მისასალმებელია. ვფიქრობთ, რომ ჩვენი ორმხრივი სტრატეგიული ურთიერთობების დინამიკა ძალიან მაღალია. ასევე ვფიქრობთ, რომ ორმხრივი სტრატეგიული ურთიერთობების ფორმატი, რომელშიც 4 ძირითადი მიმართულებაა არჩეული - უსაფრთხოების მიმართულება, კულტურული და ხალხთაშორისი ურთიერთობა, დემოკრატიის განვითარება და ეკონომიკა, ენერგეტიკა და ვაჭრობის მიმართულება, საკმაოდ დინამიურად ვითარდება და ჩვენ ვფიქრობთ, რომ მაიკ პენსის ვიზიტი კიდევ ერთი ძალიან მნიშვნელოვანი სტიმულია ამ ორმხრივი ურთიერთობების ბიძგის მისაცემად.
არაერთი მნიშვნელოვანი შეხვედრა იგეგმება ამ ვიზიტის დროს და მინდა გამოვთქვა, ძალიან დიდი კმაყოფილება, რომ ეს ვიზიტი საქართველოში რამდენიმე დღეში შედგება“, - განაცხადა კვირიკაშვილმა.
აშშ-ის ვიცე პრეზიდენტის, მაიკ პენსის ვიზიტი საქართველოში 31 ივლისს-1-ელ აგვისტოს შედგება.