კომენტარი

გია ვოლსკი პრეზიდენტის განცხადებას დაუფიქრებელს უწოდებს

საპარლამენტო უმრავლესობის წევრი, გია ვოსლკი ფიქრობს, რომ პრეზიდენტის განცხადება ,,გაზპრომთან’’ გაფორმებულ ხელშეკრულებასთან დაკავშირებით იყო "დაუფიქრებელი."

როგორც ვოლსკიმ ჟურნალისტებს განუცხადა, ენერგეტიკის მინისტრ, კახი კალაძესთან გიორგი მარგველაშვილს კომუნიკაცია არ ჰქონია.

„ყველანი ვცდილობთ, რომ პრეზიდენტის განცხადება ჩვენ, პარლამენტარებმა, არ წარმოვაჩინოთ ისე, როგორც ახალი დაპირისპირება, თუმცა პრეზიდენტი თავად ამას არ ფიქრობს. დაუფიქრებელი განცხადება არის გაკეთებული და სულ მცირე, არაკომპეტენტურობის მაჩვენებელი,“ - განაცხადა გია ვოლსკიმ.

დეპუტატი ფიქრობს, რომ პარლამენტის წევრებს პრეზიდენტის შეხსენება ამ საკითხზე არ სჭირდებათ, ხოლო ანგარიშის წარსადგენად ენერგეტიკის მინისტრი მზად არის.

,,სურათი აბსოლუტურად ნათელია, მით უმეტეს, პრეზიდენტისათვის. მას გააჩნია ამდენი რესურსი. არ იყო ძნელი, რომ გარკვეულიყო, ზუსტად რა ხდებოდა. მოეთხოვა კომენატრები სამინისტროდან და ამის შემდეგ გაეკეთებინა დაუფიქრებელი კომენტარები’’, - აცხადებს გია ვოლსკი.

ცნობისათვის: გაზპრომის ხელშეკრულების საკითხზე საქართველოს პრეზიდენტის პრესსპიკერმა განცხადება გუშინ გააკეთა. მისი თქმით, ხელშეკრულების ხელმოწერით ენერგოსექტორში მდგომარეობა გაუარესდა.

ნინო ექვთიმიშვილი