პოლიტიკა

გიორგი გახარიას პარლამენტში ხვალ 16 საათზე მოუსმენენ

ხვალ, 16 საათზე საქართველოს პარლამენტში შინაგან საქმეთა მინისტრის, გიორგი გახარიას მოსმენა დაიწყება. ამის შესახებ ბიუროს დღევანდელ სხდომაზე პარლამენტის ვიცე-სპიკერმა თამარ ჩუგოშვილმა განაცხადა.

გიორგი გახარია პარლამენტის პლენარულ სხდომაზე სამ საკითხზე ისაუბრებს, ესენია: 2018 წელს შსს-ის მიერ გაწეული სამუშაოების შედეგები, შსს-ში მიმდინარე და დაგეგმილი რეფორმები და ასევე 2018 წლის 12 მაისს კლუბებში -„ბასიანსა“ და „გალერიში“ ჩატარებული სპეცოპერაცია.

ცნობისთვის, შაბათს გამთენიისას თბილისის კლუბებში, „ბასიანსა“ და „გალერიში“ შეჭრის გამო რუსთაველის გამზირზე 2 დღის განმავლობაში აქცია „ჩვენი თავისუფლებისთვის“ მიმდინარეობდა. სპეცრაზმის შეჭრის გარდა აქციის მონაწილეები აპროტესტებდნენ პოლიციის ძალადობრივ ქმედებებსა და მოქმედ ნარკოპოლიტიკას.

კვირას აქციის პარალელურად ნაციონალისტურმა ჯგუფებმა კონტრაქცია გამართეს. ისინი ცდილობდნენ პოლიციელთა კორდონის გარღვევას და პარლამენტთან შეკრებილ ხალხამდე შეღწევას. ისინი აგრესიულად იქცეოდნენ. ისმოდა ძალადობრივი შეძახილები აქცია „ჩვენი თავისუფლებისთვის“ შეკრებილთა მისამართით.

14 მაისის შუაღამით, აქციის „ჩვენი თავისუფლებისთვის“ ორგანიზატორებთან შინაგან საქმეთა მინისტრი გიორგი გახარია მივიდა. მოლაპარაკებების შემდეგ მან შეკრებილ საზოგადოებას ბოდიში მოუხადა და დაშლისკენ მოუწოდა. აქციის ორგანოზატორების თქმით, ისინი ერთი კვირის განმავლობაში ნარკოპოლიტიკის შეცვლასთან და კლუბებში შეჭრისას სამართალდამცავების ქმედებების გამოძიებასთან დაკაშირებით ხელისუფლების წარმომადგენლებს შეხვდებიან. ორგანიზატორების განმარტებით, თუ მოლაპარაკებები შედეგს არ გამოიღებს, ისინი 19 მაისს კვლავ შეიკრიბებიან პარლამენტის წინ.