კონფლიქტის ზონა

გიორგობა დღეს ეკლესიის მონახულებისთვის ხელის შეშლა თავისთავად არის ძალიან სერიოზული პროვოკაცია - ქეთევან ციხელაშვილი

შერიგებისა და სამოქალაქო თანასწორობის საკითხებში სახელმწიფო მინისტრმა, ქეთევან ციხელაშვილმა პროვოკაციად შეაფასა დე-ფაქტო ცხინვალის რეჟიმის გადაწყვეტილება საქართველოს მოქალაქეებისთვის ეკლესიაში მისვლის ხელის შეშლის შესახებ. საქმე ეხებოდა მრევლის მიერ გიორგობის აღნიშვნას სოფელ აძვისთავში.

„წლების განმავლობაში ჩვენი მოლაპარაკებების დღის წესრიგის ერთ-ერთი მთავარი თემა ყოველთვის არის ჰუმანიტარული წვდომა - ზოგადად გადაადგილების თავისუფლება, მაგრამ განსაკუთრებით ისეთ დღესასწაულებზე, რომელიც ადგილობრივი მოსახლეობისთვის წარმოადგენს განსაკუთრებულ სიწმინდეს.

გიორგობა დღეს ეკლესიის მონახულებისთვის ხელის შეშლა თავისთავად არის ძალიან სერიოზული პროვოკაცია. ჩვენ გვქონდა კომუნიკაცია ჟენევის თანათავმჯდომარეებთან ევროკავშირის მონიტორინგის მისიის ხელმძღვანლობასთან იმის თაობაზე, რომ ერთი მხრივ, არანაირი პროვოკაცია არ დაიგეგმებოდა ქართული მხარის მიერ, მაგრამ იმ ადამიანების მხრიდან, ვისაც ტრადიციულად აქვს სურვილი, უფლება და უნდათ, რომ ეწვიონ ეკლესიას და დღესასწაულზე დაანთონ სანთელი, მათ უნდა ჰქონდეთ ასეთი წვდომის შესაძლებლობა. ნებისმიერი ხელისშემშლელი მოქმედება ეწინააღმდეგება არა მხოლოდ კანონს, სამართალს, არამედ ადამიანურ ღირებულებებსაც", - განაცხადა ციხელაშვილმა.

თავად ოკუპირებული სამხრეთ ოსეთის დე-ფაქტო ხელისუფლებამ პროვოკაციად შეაფასა ქართული მართლმადიდებელი ეკლესიის წარმომადგენლებლისა და მრევლის სოფელ აძვისთავში გადასვლის სურვილი. ამის გამო სოფელ აძვისთავის მაგივრად სასულიერო პირებმა გიორგობასთან დაკავშირებული პარაკლისი სოფელ აძვის სამებაში აღავლინეს.