საზოგადოება

გრიპის ვირუსის მეორე ტალღისთვის ჯანდაცვის სისტემა მზადყოფნაშია - ამირან გამყრელიძე

საქართველოს დაავადებათა კონტროლის ეროვნული ცენტრის ხელმძღვანელი ამირან გამყრელიძე აცხადებს, რომ ქვეყანაში „ტამიფლუს“ საკმარისი მარაგია, რომ ამბულატორიულ სექტორში დროულ ეტაპზე დაიწყოს ანტივირუსული მკურნალობა.

როგორც ამირან გამყრელიძემ განაცხადა, გრიპის საწინააღმდეგო ვაქცინაცია გასულ წელს 41 ათასმა ადამიანმა გაიკეთა.

„ევროპაში გრიპის სეზონი მე-40 კვირას იწყება და მომავალი წლის მე-20 კვირამდე გრძელდება. ჩვენ გრიპზე დაკვირვების მრავალწლიანი მაჩვენებელი გვაქვს. შეიძლება, იყოს ერთი, ორი ან მეტი ტალღა. არ არის აუცილებელი, მეორე ტალღა თებერვალში იყოს, მაგრამ ქვეყანა მზად უნდა იყოს. ჯანდაცვის სისტემა მზადყოფნაშია. თუ თებერვალში გრიპის ვირუსის მატება მოხდა, ამისთვის ჯანდაცვის სისტემა შესაბამის ზომებს მიიღებს. რაც შეეხება „ტამიფლუს“, მისი გაცემა სეზონის ბოლომდე რეცეპტის ან ფორმა 100-ის საფუძველზე უფასოდ გრძელდება“, – აღნიშნა გამყრელიძემ.

ჯანდაცვის სამინისტროში აცხადებენ, რომ აცრის არცერთი მსურველი ვაქცინის გარეშე არ დარჩება. ე.წ. ღორის გრიპის ეპიდაფეთქება ბოლო პერიოდში შედარებით შესუსტდა, თუმცა კლინიკებში უმძიმეს მდგომარეობაში კიდევ 48 პაციენტი რჩება.