პოლიტიკა

იმედია, საქართველოს პრეზიდენტი გამოიყენებს ვეტოს უფლებას, თუკი ამ კვირაში საკონსტიტუციო პროექტს დაამტკიცებენ - სალომე სამადაშვილი

„ერთიანი ნაციონალური მოძრაობის“ წევრმა სალომე სამადაშვილმა იმედი გამოთქვა, რომ საქართველოს პრეზიდენტი საკონსტიტუციო ცვლილებათა კანონპროექტს ვეტოს დაადებს.

მისივე ინფორმაციით, ოპოზიციური პარტიები დღეს შეხვედრას გამართავენ, სადაც ახალ სამოქმედო გეგმას შეიმუშავებენ.

„ჩვენ უნდა გვესმოდეს, რომ ვენეციის კომისია აკეთებს კონსტიტუციის პროექტის სამართლებრივ შეფასებას, მაგრამ კონსტიტუცია, უპირველეს ყოვლისა, პოლიტიკური დოკუმენტია. ამიტომ უმთავრესი მოთხოვნა, რაც იყო წაყენებული საკონსტიტუციო პროცესთან, ეს იყო პოლიტიკური კონსენსუსის შექმნა. ფაქტია, რომ ეს კონსენსუსი ვერ შედგა. დღეს გაიმართება კიდევ ერთი შეხვედრა ოპოზიციურ პარტიებს შორის, რომლებიც მოქმედების ერთობლივ გეგმას დასახავენ და მე ძალიან დიდი იმედი მაქვს, რომ საქართველოს პრეზიდენტი გამოიყენებს ვეტოს უფლებას იმ შემთხვევაში, თუ შემოთავაზებული პროექტის დამტკიცება რიგგარეშე სესიაზე მიმდინარე კვირას მაინც მოხდება, იმიტომ რომ ეს არის ამ ქვეყნისა და დემოკრატიის მომავლისტვის ფუნდამენტურად მნიშვნელოვანი“, - თქვა სამადაშვილმა.

ანა მებურიშვილი