პოლიტიკა

იოსებ სიგუა თანამდებობაზე არის თუ არა, მას ჩვენი კითხვებისთვის პასუხის გაცემა მოუწევს - სერგი კაპანაძე

ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის თავმჯდომარის, სერგი კაპანაძის თქმით, თბილისის დეტექტივების სამმართველოს უფროს იოსებ სიგუას კომისიის კითხვებზე პასუხი მაინც მოუწევს.

დეპუტატის თქმით, ის მედიიდან გაიგო, რომ სიგუა შეუძლოდაა, თუმცა კომისიაში ამის დაზუსტებას შეეცდებიან.

„დღეს ჩვენ შსს-ის წარმომადგენლების მოსმენას ვაგრძელებთ. ბატონი ბედოიძე და ფიფია ჩვენთან არიან. მათთან დაკავშირებით საკმაოდ ბევრი კითხვა გვაქვს. ამ კითხვებზე მათ პასუხების გაცემის გაგრძელება მოუწევთ. სამწუხაროა, რომ ბატონი სიგუა ჯერ არ მოსულა. ჩვენ პრესიდან ინფორმაცია გავიგეთ, რომ შესაძლოა, ცუდად იყოს. ამას გავარკვევთ, იმიტომ რომ ჩვენთან შეტყობინება იმასთან დაკავშირებით არ მოსულა, რომ ის ცუდად არის. თუ ეს მართლა ასეა, მას ჩვენთვის ამის ახსნა და დადასტურება მოუწევს. მაგრამ, ნებისმიერ შემთხვევაში, თუ ჩვენ მის მიმართ კითხვები გვაქვს, მას ამ კითხვებზე პასუხის გაცემა მოუწევს. ეს გარდაუვალია, ისე, როგორც ნებისმიერ სხვა თანამდებობის პირს. ამიტომ, მინდა ყველას მოვუწოდო, რომ აქ მოსასვლელად კარგად მოემზადონ და ნუ ექნებათ იმედი, რომ ან ჯანმრთელობისა თუ სხვა რაიმე მიზეზით თავს აარიდებენ იმ კითხვებს, რომელიც კომისიას და ასევე საზოგადოებას აქვს“, – განაცხადა კაპანაძემ.

კითხვაზე, რამდენად დამაჯერებელია მისთვის სიგუას ავად გახდომის გამო კომისიის დღევანდელ სხდომაზე გამოუცხადებლობა, კაპანაძემ უპასუხა, რომ კომისია გადაამოწმებს გავრცელებულ ინფორმაციას სიგუას თანამდებობიდან გაშვების შესახებ.

„ეგ გაირკვევა, თუ გუშინდელი სხდომის შემდეგ სამსახურიდან გაუშვეს. ჩვენ იმის გარკვევა მოგვიწევს, თუ რა მიზეზით გაუშვეს, მან რა იცის და რა კითხვებზე შეეცადნენ, რომ პასუხები არიდებული ყოფილიყო. ნებისმიერ შემთხვევაში, ადამიანი თანამდებობაზე არის თუ არა, მას ჩვენი კითხვებისთვის პასუხის გაცემა მოუწევს. როგორც ბატონ შოთაძეს მოუწევს და სხვა ყოფილ თანამდებობის პირებს, ვინც ჩართულები იყვნენ, ნებისმიერს ისე მოუწევს. სამსახურიდან გაშვება, ცუდად გახდომა და სხვა არამც და არამც არავის პასუხისმგებლობისგან არ გაათავისუფლებს, რომ აქ მოვიდეს და ჩვენ ახსნა-განმარტება მოგვცეს“, – განაცხადა კაპანაძემ.

შსს-ის ინფორმაციით, იოსებ სიგუა ავად გახდა და უცნობია, როდის მოახერხებს ის კომისიაში გამოცხადებას.

უწყებაში არ დაადასტურეს გავრცელებული ინფორმაცია, რომ კომისიის გუშინდელ სხდომის შემდეგ სიგუას პატაკი დააწერინეს და სამსახურიდან გაუშვეს.