საზოგადოება

ირაკლი აბესაძე ავტომანქანების ტექნიკური დათვალიერების შემოღებაში კორუფციის საფრთხეს ხედავს

ერთიანი ნაციონალური მოძრაობის წევრი, ირაკლი აბასაძე აცხადებს, რომ ავტომანქანების ტექნიკური დათვალიერების შემოღება კორუფციის საფრთხეს წარმოშობს.

როგორც აბესაძემ დღეს გამართულ ბრიფინგზე განაცხადა, მთავრობის ეს გადაწყვეტილება საქართველოში არსებული ეკონომიკური მდგომარეობიდან გამომდინარე, მოსახლეობისთვის ზედმეტი დანახარჯი იქნება.

„ასეულობით ათასი მანქანა რეალურად ვერ გაივლის ტექნიკურ დათვალიერებას და ეს ყველაფერი განპირობებულია ქვეყნის მძიმე სოციალურ-ეკონომიკური მდგომარეობით და იმით, რომ ოჯახების შემოსავლები არ იძლევა საშუალებას, შეძენილი იქნეს უკეთესი ავტომობილები.

ამ სიტუაციაში არანაირი ილუზია, რომ ასიათასობით ავტომანქანა აგაჩერდება და ეს ადამიანები ხშირ შემთხვევაში შემოსავლის წყაროს გარეშე დარჩებიან, არ არსებობს. უბრალოდ, ეს იქნება მთლიანად კორუმპირებული, კორუფციული სისტემა და ნაცვლად იმისა, რომ მთავრობა ზრუნავდეს ამ ოჯახების წევრების დასაქმებაზე, მათი შემოსავლების გაზრდაზე და სოციალური მდგომარეობის გაუმჯობესებაზე, დამატებით ამ ოჯახების ბიუჯეტიდან ამოღებული იქნება ქრთამის თუ მოსაკრებლის სახით დამატებითი თანხები “ - განაცხადა ირაკლი აბესაძემ.

ნინო ექვთიმიშვილი