კომენტარი

ის იქცეოდა დღეს როგორც გამაერთიანებელი ლიდერი - ზაქარია ქუცნაშვილი

პარტია „ქართული ოცნების“ ლიდერმა, ბიძინა ივანიშვილმა განაცხადა, რომ ის არ დაზოგავს არც პირად დროს და არც ენერგიას, რათა საზოგადოებასთან და გუნდთან შეთანხმება მოხდეს, – ამის შესახებ საპარლამენტო უმრავლესობის წევრმა, ზაქარია ქუცნაშვილმა განაცხადა.

მისი შეფასებით, სხდომაზე ბიძინა ივანიშვილი ისმენდა ყველას აზრს უზენაესი სასამართლოს მოსამართლეების საკითხთან დაკავშირებით.

„ის იქცეოდა დღეს როგორც გამაერთიანებელი ლიდერი, როცა ცდილობდა, ყველასთვის მოესმინა, ვინც ამ საკითხზე საკუთარ აზრს გამოთქვამდა. მეც ვერ შევძელი აზრის გამოთქმა, რადგან ჩემს წინ ბევრი იყო ჩაწერილი. ამიტომაც ვფიქრობთ, ხვალაც განვაგრძოთ მსჯელობა და რამდენი დროც იქნება საჭირო, იმდენი დავხარჯოთ“, – აღნიშნა დეპუტატმა.

მისი შეფასებით, პროცესი, რომელიც მიმდინარეობს, ძალიან სერიოზულია.

„ჩვენ თვალწინ იბადება თავისუფალი სასამართლო ხელისუფლება. ეს ძალიან სერიოზული პროცესია. მოგეხსენებათ, მეცხრე მოწვევის პარლამენტი გვყავს და საზოგადოებაში კიდევ არის კითხვები დემოკრატიასთან მიმართებაში“, – განაცხადა ქუცნაშვილმა და აღნიშნა, რომ გადაწყვეტილება ახალი წესებისა და კრიტერიუმების საფუძველზე უნდა იყოს მიღებული.