მსოფლიო

„ისლამური სახელწმიფო“ იერუსალიმის გამო აშშ-ს ახალი ტერაქტებით ემუქრება

ტერორისტული ორგანიზაცია „ისლამური სახელმწიფო“ დონალდ ტრამპის მიერ იერუსალიმის ისრაელის დედაქალაქად გამოცხადების გამო აშშ-ს ახალი ტერაქტებით ემუქრება.

სოციალურ ქსელში გამოქვეყნდა განცხადება სახელწოდებით „დაგველოდეთ“ და „ისლამური სახელმწიფო მანჰეტენზე“.

„ჩვენ უფრო მეტ ოპერაციას ჩავატარებთ თქვენს მიწაზე ფინალურ საათამდე და დაგწვავთ ომის ცეცხლში, რომელიც წამოიწყეთ ერაყში, იემენში, ლიბიაში, სირიასა და ავღანეთში. უბრალოდ დაგველოდეთ“, - წერია განცხადებაში.

„თქვენი ძაღლის [დონალდ ტრამპის] მიერ იერუსალიმის ისრაელის დედაქალაქად გამოცხადება გვაიძულებს, ვაღიაროთ ასაფეთქებელი თქვენი ქვეყნის დედაქალაქად“, - ნათქვამია მიმართვაში.

დონალდ ტრამპმა იერუსალიმი ისრაელის დედაქალაქად წინა კვირას გამოცხადა, რამაც საპროტესტო ტალღა გამოიწვია არაბულ სამყაროში. აშშ-ის პრეზიდენტის საპასუხოდ 13 დეკემბერს ისლამური თანამშრომლობის ორგანიზაციის წევრებმა აღმოსავლეთ იერუსალიმი პალესტინის დედაქალაქად აღიარეს.

წმინდა ქალაქი ისრაელსა და პალესტინას შორის დიდი ხნის დავის საგანია.

ანა მებურიშვილი