საზოგადოება

ხანდოს ხეობის მოსახლეობას ყველანაირ კვლევას ჩავუტანთ, რომ დავარწმუნოთ, საშიშროება არ ემუქრებათ - კახა კალაძე

საქართველოს ვიცე-პრემიერისა და ენერგეტიკის მინისტრის კახა კალაძის განცხადებით, უწყება ელოდება გერმანულ კომპანიას, რომელიც მაღალი ძაბვის ელექტროგადამცემი ხაზების პროექტის ავტორია, რათა მათი კვლევები ხანდოს ხეობის მოსახლეობას გააცნოს.

„ჩვენ ველოდებით კონკრეტულ გერმანულ კომპანიას, ვინც ეს პროექტი დააპროექტა და ამ ადამიანებთან ერთად, ჩავიტანთ ყველანაირ კვლევას, ვაჩვენებთ ადგილობრივ მოსახლეობას, რომ დავარწმუნოთ, რომ არანაირი საშიშიროება ამ პროექტის განხორციელების შედეგად იქ მცხოვრებ ადამიანებს არ ემუქრებათ“,- განაცხადა კალაძემ.

კალაძემ აღნიშნა, რომ სამუშაოები მიმდინარეობს, თუმცა მხოლოდ სამ ადგილზეა შეჩერებული.

შეგახსენებთ, ხანდოს ხეობის მოსახლეობა მაღალი ძაბვის ელექტროგადამცემი ხაზების მშენებლობას აპროტესტებს. მათი აზრით, ეს ეკოლოგიურ კატასტროფას გამოიწვევს.

ანა მებურიშვილი