პოლიტიკა
ხორავას ქუჩის საქმის შემსწავლელი დროებითი საპარლამენტო საგამოძიებო კომისია მუშაობს დღეს, 15:00 საათზე განაახლებს
ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისია მუშაობას დღეს, 15:00 საათზე განაახლებს. დღევანდელ სხდომაზე გამომძიებელ ირაკლი ფიფიას, დეტექტივების სამმართველოს უფროსის იოსებ სიგუასა და თბილისის პოლიციის დეპარტამენტის უფროსის შალვა ბედოიძის მოსმენა გაგრძელდება.
კომისიის წევრ მამუკა მდინარაძის თქმით, მიუხედავად იმისა, რომ გუშინ მათ გარკვეულ კითხვებზე პასუხი მიიღეს, კითხვის ნიშნები ისევ რჩება.
„თქვენ გახსოვთ, რომ თავიდან იყო მთავარი კითხვები, ეს შეეხებოდა ფარდულის დანგრევას, გაღუნულ დანას, სუბელიანს, ამასთან დიდი წილი კითხვების პრაქტიკულად გაცემულია. ახლა სხვა კითხვის ნიშნებია, რაზეც ასევე ამომწურავი პასუხები უნდა მივიღოთ, გამომძიებლები იქნებიან ესენი თუ პროკურორები“, -აღნიშნა დეპუტატმა.
გუშინ კომისიამ შსს-სა და მთავარ პროკურატურის მიმართ სერგი კაპანაძის მიერ ინიცირებული რეკომენდაცია გასცა, რაც გულისხმობს მოზარდებს შორის მომხდარი კონფლიქტის დროს, გ.მ.-ს დაჭრის ფაქტზე გამოძიების დაწყებას, ასევე დავით სარალიძის ჯგუფურად განზრახ მკვლელობაში თანამონაწილეობის ფაქტზე მ.კ.-ს მიმართ სისხლის სამართლებრივი დევნის წამოწყებას.