საზოგადოება

ხორბლის გადამზიდავთა აქციის ერთ-ერთი მონაწილე სახურავიდან გადმოხტომით ან თავის დაწვით იმუქრება

ლილოს ტერმინალში, გაფორმების ეკონომიკურ ზონასთან, ხორბლის გადამზიდავთა აქციის ერთ-ერთი მონაწილე, ჯანო ამყოლაძე თავის მოკვლით იმუქრება.

ამყოლაძე შენობის სახურავზე აძვრა და ბენზინი გადაისხა. ის ფინანსთა მინისტრთან, ივანე მაჭავარიანთან
შეხვედრას ითხოვს, წინააღმდეგ შემთხვევაში, სახურავიდან გადმოხტომით ან თავის დაწვით იმუქრება.

ამყოლაძე სხვა გადამზიდავების მსგავსად, ითხოვს იმ ბრძანების გაუქმებას, რომლის მიხედვითაც, ქვეყანაში ხორბლის გადატანა ავტოსატრანსპორტო საშუალებებით უნდა აიკრძალოს.

მამაკაცის კოლეგების თქმით, ამყოლაძეს ფინანსური პრობლემები აქვს, რაც პროტეტსის უკიდურეს ფორმამდე მიიყვანა.

ადგილზე მობილიზებული არიან სამართალდამცველები და სახანძრო-სამაშველო ბრიგადის ერთი ეკიპაჟი.

გუშინ ფინანსთა მინისტრსა და ხორბლის გადამზიდავთა საინიციატივო ჯგუფს შორის შეხვედრა შედგა, რომელზეც ივანე მაჭავარიანმა განაცხადა, რომ ავტოსატრანსპორტო საშუალებით ხორბლის გადაზიდვა წლის ბოლომდე ნებადართული იქნება.

გადამზიდავები უკვე მე-4 დღეა, გაფორმების ეკონომიკურ ზონასთან აქციას მართავენ.

ავტოსატრანსპორტო საშუალებით ხორბლის ან ხორბალ-ჭვავის ფქვილის შემოტანა-გატანის აკრძალვა 15 სექტემბრიდან იყო დაგეგმილი, თუმცა პირველ ოქტომბრამდე გადავადდა.