პოლიტიკა

კომისიის თავმჯდომარემ და მომხსენებლებმა ცალსახად გაუსვეს ხაზი, რომ დოკუმენტში რჩება მთელი რიგი ნაკლოვანებები - ანა დოლიძე

პრეზიდენტის საპარლამენტო მდივნის, ანა დოლიძის ინფორმაციით, ვენეციის კომისიამ დღევანდელ შეხვედრაზე გაამახვილა ყურადღება საკონსტიტუციო ცვლილებების ხარვეზებზე, მაგალითად, ფართო შეთანხმების არარსებობაზე. - ამის შესახებ დოლიძემ „რუსთავი 2“-თან სატელეფონო საუბარში თქვა.

„კომისიის თავმჯდომარემ და მომხსენებლებმა ცალსახად გაუსვეს ხაზი იმას, რომ დოკუმენტში რჩება მთელი რიგი ნაკლოვანებები, რომლებიც უნდა გამოსწორდეს. ეს ეხება ფართო კონსესუსის ნაკლებობას, ასევე რჩება პროპორციული არჩევნები, ბონუსის სისტემა და ა.შ“, -თქვა დოლიძემ.

დოლიძის თქმით, ვენეციის კომისიის თავმჯდომარემ ჯანი ბუკიკიომ აღნიშნა, რომ პრეზიდენტს შეუძლია გადამწყვეტი როლი შეასრულოს კონსესუსის მიღწევაში.

„პრეზიდენტი მზადაა, დარჩენილ დროში ხელი შეუწყოს ფართო კონსესუსის შექმნას. ამ შესაძლებლობის გამოყენების აუცილებლობაზე ასევე ისაუბრა ჯანი ბუკიკიომ თავისი დასკვნითი სიტყვის დროს“, -თქვა დოლიძემ.

შეგახსენებთ, დღეს ვენეციის კომისია პარლამენტის მიერ სამი მოსმენით მიღებულ კონსტიტუციაზე საბოლოო დასკვნას მოამზადებს, რომელიც საზოგადოებისთვის ორშაბათს გახდება ცნობილი.

ანა მებურიშვილი