საზოგადოება

კონსტიტუციაში გამოკვეთილად არ წერია საცხოვრისის შესახებ - ბექა ნაცვლიშვილი

საპარლამენტო უმრავლესობის, ფრაქცია „სოციალ-დემოკრატების“ წევრის ბექა ნაცვლიშვილის განცხადებით, ფრაქცია საკონსტიტუციო ცვლილებზე მომუშავე კომისიას ორი ინიციატივით მიმართა.

როგორც ნაცვლიშვილმა პრესკონფერენციაზე განმარტა, პირველი ინიციატივა შეეხება კონსტიტუციიდან იმ მუხლის ამოღებას, რომელიც ახალი გადასახადების შემოღებასა და გადასახადების გაზრდის შემთხვევაში, რეფერენდუმის აუცილებლობას გულისხმობს.

მეორე ინიციატივა, გულისხმობს ადამიანების სოციალური უფლებების განმკაფიოებას.

„გამკაფიოებას იმისა, თუ ამ უფლებების განხორციელებაზე ვინ იღებს პასუხისმგებლობას. ანუ, მაგალითად, ყველას აქვს უფლება მიიღოს განათლება, მაგრამ ამ უფლების განხორციელებისთვის თანხა არ აქვს; ყველას აქვს უფლება მივიდეს სამედიცინო დაწესებულებაში და მოითხოვოს შესაბამისი სერვისები, მაგრამ ფული არ აქვს - ანუ, ამ შემთხვევაში, ამ უფლებების განხორციელებაზე ვინ არის პასუხისმგებელი“,-განმარტა დეპუტატმა.

გარდა ამისა, ნაცვლიშვილის თქმით, კონსტიტუციას უნდა დაემატოს ადამიანის ახალი უფლება - უფლება ღირსეულ საცხოვრისზე, რომელიც არის ჩვენი ქვეყნისთვის და შექმნილი სოციალურ-ეკონომიკური მდგომარეობისთვის აუცილებელი ჩამატება.

„რომ გაჩნდეს პასუხისმგებელი ვინც იქნება ამ საკითხების ორგანიზებასა და მოწყობაზე. კონსტიტუციაში გამოკვეთილად არ წერია საცხოვრისის შესახებ. ეს საკითხი მარტო სოციალურ დაუცველებს არ ეხებათ. ეს უნდა მოხდეს საბინაო პოლიტიკის წარმოებით, საბინაო ფონდის შექმნით. რა თქმა უნდა ეს ერთბაშად არ მოხდება, მაგრამ კონსტიტუციაში, როდესაც ჩაიწერება და აღიარებული იქნება ეს როგორც ერთ-ერთი უზენაესი ღირებულება, შესაბამისად, დადგება ნებისმიერი მთავრობა იმ პასუხისმგებლობის წინაშე, რომ გაატაროს ამ ტიპის პოლიტიკა. მაგალითად, მე როგორც მაჟორიტარს ისანში ვიცი უამრავი შემთხვევა, რომ ეს საკითხი მწვავედ დგას. ადამიანებმა ბინა დატვირთეს იპოტეკით, შემდეგ დაკარგეს ეს ბინა და დარჩნენ საცხოვრისის გარეშე. ადამიანები ხდებოდნენ იძულებული ცარიელ შენობებში შეჭრილიყვნენ. ეს ტენდენცია, რომ არ გაღრმავდეს, საჭიროა რომ სახელმწიფომ აიღოს პასუხისმგებლობა და საბინაო პოლიტიკის წარმოებით შეამსუბუქოს შექმნილი ვითარება“,-აღნიშნა ნაცვლიშვილმა.

მისი თქმით, ამ ინიციატივას საკონსტიტუციო კომისიაშიც ყავს მომხრეები.

მონიკა დავლიანიძე