საზოგადოება

კრიმინალები უნდა დაისაჯონ, მაგრამ საქართველოს არ სჭირდება კონფლიქტი ჩინეთის სახელმწიფო კომპანიასთან - ირაკლი პეტრიაშვილი

საქართველოს გაერთიანებული პროფკავშირების თავმჯდომარის, ირაკლი პეტრიაშვილის განცხადებით, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებულები მუშაობას მანამ არ განაახლებენ, სანამ ჩინური კომპანია ,,23-ბიუროს“ წევრები არ დაისჯებიან.

ირაკლი პეტრიაშვილის თქმით, კრიმინალი დამსაქმებლები უნდა დაისაჯონ, მაგრამ საქართველოს ჩინურ კომპანიასთან კონფლიქტი არ სჭირდება.

,,მე მესმის, რომ მდგომარეობა რთულია, მე მესმის, რომ ამ კრიმინალი დამსაქმებლების მიერ ჩადენილი დანაშაული უნდა დაისაჯოს და უნდა იყოს ადეკვატური სასჯელი, ამ მოლოდინში ვართ და ბუნებრივია, მუშაობა არ განახლდება მანამ, სანამ ეს კრიმინალები არ დაისჯებიან, მაგრამ ეს არ უნდა გადაიზარდოს რაღაც ფობიებში და ასე შემდეგ - საქართველოს არ სჭირდება კონფლიქტი, მით უმეტეს, ჩინეთის სახელმწიფო კომპანიასთან. მე იმედი მაქვს, რომ სამართალდამცავები ბოლომდე შეინარჩუნებენ სიტუაციას“, - განაცხადა პროფკავშირების თავმჯდომარემ ირაკლი პეტრიაშვილმა.

შეგახსენებთ, ჩინური კომპანიის წარმომადგენლებმა რამოდენიმე მუშას რკინის კონსტრუქციებითა და სამუშაო იარაღებით ფიზიკური დაზიანებები მიაყენეს. შინაგან საქმეთა სამინისტრომ ფაქტზე ჩინეთის სამი მოქალაქე დააკავა. მათ ბრალად ჯანმრთელობის განზრახ ნაკლებად მძიმე დაზიანება ედებათ.

მარი ნამგალაძე