საზოგადოება

ყველა ბაღის მეორე სართულზე, სადაც ფანჯრებია, ბადეები დამონტაჟდება - კახაბერ გვანცელაძე

თბილისის ბაგა-ბაღების მართვის სააგენტოს ხელმძღვანელის, კახაბერ გვანცელაძის ინფორმაციით, 17 სექტებრამდე, წესით, ყველა საბავშვო ბაღის ფანჯარა უსაფრთხოების ბადეებით უზრუნველყოფილი უნდა იყოს.

როგორც გვანცელაძემ დღევანდელ პრესკონფერენციაზე განაცხადა, სააგენტო ყველაფერს აკეთებს იმისათვის, რომ 17 სექტემბერს ბაღები სრულ მზადყოფნაში შეხვდნენ სააღმზრდელო პროცესს.

მისი თქმით, ბავშვთა უსაფრთხოება სააგენტოს მთავარი პრიორიტეტია.

„ეს არის მულტისექტორული თემა. პირველი - ეს გახლავთ შენობების კონსტრუქციული მდგრადობა და ამ მხრივ მთელი რიგი პროცესები მიმდინარეობს სამხარაულის ექსპერტიზის ბიუროსთან ერთად. მეორე - გახლავთ სახანძრო უსაფრთხოება, სადაც ახალი ტექნოლოგიებით სამისამართო დეტექტორებს ვაყენებთ. ეს გულისხმობს კვამლის დეტექტორებს, რომელიც საშუალებას იძლევა, რომ მალე მოვახდინოთ რეაგირება. გარდა ამისა, ვარემონტებთ სახანძრო კიბეებსაც. მესამე - გახლავთ „ყაზტრანსგაზ-თბილისის“ მოთხოვნები, რამეთუ მიზანშეწონილი არ არის შენობაში იყოს გაზქურები. ეს გარკვეული აირების დაგროვებას იწვევს და საფრთხის შემცველია. აქედან გამომდინარე, 12 ბაღში გაზქურებს ელექტროქურებით ვცვლით“, - განაცხადა კახაბერ გვანცელაძემ.

მისივე თქმით, უსაფრთხოების ბადეები სააგენტოს ერთ-ერთი მთავარი პრიორიტეტია. როგორც მან აღნიშნა, ყველა ბაღის მეორე სართულზე, სადაც ფანჯრებია, ბადეები დამონტაჟდება.

„ამასთანავე მნიშვნელოვანია საკვები პროდუქტების უსაფრთხოება და ამაზე სურსათის უვნებლობის სააგენტოსთან ერთად ვმუშაობთ. ყველაფერს ვაკეთებთ, რომ 17 სექტემბერს სრულ მზადყოფნაში შევხვდეთ სააღმზრდელო პროცესს“, - აღნიშნა გვანცელაძემ.