საზოგადოება

ყველა სასაზღვრო პუნქტში პრევენციული ღონისძიებები გრძელდება - საგანგებო სიტუაციების კოორდინაციისა და გადაუდებელი დახმარების ცენტრი

საგანგებო სიტუაციების კოორდინაციისა და გადაუდებელი დახმარების ცენტრის მედიკოსები რისკ ჯგუფში მყოფ თითოეულ მგზავრს თერმული სკანერებით, დისტანციური თერმომეტრებითა და სპეციალური აღჭურვილობით პერმანენტულად ამოწმებენ, - აცხადებენ საგანგებო სიტუაციების კოორდინაციისა და გადაუდებელი დახმარების ცენტრში.

მათივე ინფორმაციით, ეკიპაჟები უზრუნველყოფილი არიან პერსონალური დაცვის სრული ეკიპირებით.

„როგორც იცით, აღნიშნული ღონისძიებების ფარგლებში, გუშინ ცენტრის გადაუდებელი დახმარების ჯგუფებმა მოახდინა კორონავირუსის მატარებელი პაციენტისთვის შესაბამისი სამედიცინო დახმარების გაწევა და მისი დაუყოვნებლივ ბოქსირებულ განყოფილებაში მოთავსება, რამაც შესაძლებელი გახადა ვირუსის მატარებელი პირის მიერ ინფექციის გავრცელების თავიდან არიდება.

ცენტრი მადლობას უხდის თითოეულ თანამშრომელს მოქალაქეთა უსაფრთხოებაზე თავდაუზოგავი ზრუნვისთვისა და შექმნილი საგანგებო სიტუაციების დროს პროფესიული თავდადებისთვის“, - ნათქვამია ინფორმაციაში.