პოლიტიკა

ყველას მხრიდან მთავარი განწყობა უნდა იყოს კონსენსუსის ძიება - გიორგი აბაშიშვილი

საქართველოს პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, მმართველ გუნდთან დღევანდელი შეხვედრის მთავარი მიზანი იქნება კონსტიტუციაზე შეთანხმების მიღწევა.

„გამოსავალი არის ერთადერთი - უნდა მოხერხდეს ფართო კონსენსუსი. კონსენსუსი შესაძლებელია და ეს დადასტურდა სხვადასხვა პოლიტიკურ პარტიებთან შეხვედრის დროს, როდესაც მიუხედავად განსხვავებული შეხედულებებისა, მთელ რიგ უმნიშვნელოვანეს საკითხებთან დაკავშირებით შესაძლებელი გახდა საერთო პოზიციის ჩამოყალიბება. შესაბამისად, ყველას მხრიდან მთავარი განწყობა უნდა იყოს კონსენსუსის ძიება. ამ შემთხვევაში ეს იქნება ზუსტად ერთადერთი გზა და ბოლო შესაძლებლობა, რათა ამ რთული მდგომარეობიდან გამოვიდეთ“, - განაცხადა აბაშიშვილმა.

ახლად მიღებულ კონსტიტუციაზე სასაუბროდ პრეზიდენტი მმართველ გუნდს დღეს 16 საათზე პრეზიდენტის სასახლეში შეხვდება.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი