სამართალი
ყველგან უნდა გვქონდეს გამართული სწრაფი რეაგირების და ადრეული შეტყობინების სისტემები - მამუკა ბახტაძე სტიქიის ზონაში იმყოფება
საქართველოს პრემიერ-მინისტრი, მამუკა ბახტაძე სტიქიის ზონაში, სოფელ ჭუბერში იმყოფება. მისი თქმით, ადგილზე არსებული ვითარება მუდმივად კონტროლდება, ხოლო წყლის დონის მომატების შემთხვევაში, შესაბამისი ზომები იქნება მიღებული.
პრემიერის თქმით, წყლის დონე ჯერ დაკლებული არ არის და გზის კაპიტალური შეკეთება წყლის დონის დაწევამდე ვერ დაიწყება.
„წყლის დონე არ არის დაწეული. აქედან გამომდინარე, საგანგებო შტაბში გადაწყვეტილება მიიღეს, რომ სახლები, რომელსაც ემუქრება საფრთხე, არის დაცული, მოსახლეობას ვეხმარებით გამოიტანონ ნივთები ამ სახლებიდან, მაგრამ უშუალოდ გზის კაპიტალურ შეკეთებას ვერ დავიწყებთ, სანამ წყლის დონე არ დაიკლებს“, – განაცხადა ბახტაძემ.
პრემიერ-მინისტრის ინფორმაციით, მდინარის ადიდება უხვმა ნალექმა გამოიწვია, თუმცა იქვე გამოჰყო ტყის უკანონო ჭრის პრობლემა.
„პირველადი შეფასებით, რა თქმა უნდა, სტიქია ჭარბმა ნალექმა გამოიწვია, მაგრამ აქვე ისიც უნდა აღვნიშნო, რომ ტყის უსისტემო ჩეხვამ მნიშვნელოვნად შეუწყო ხელი და ვინც ამით იყო დაკავებული, ამ ხალხსაც აუცილებლად მივხედავთ.
ტყის უსისტემო ჩეხვა არ შეიძლება. ესაა ჩემი პასუხი. მაგრამ ეს კონკრეტული შემთხვევა, როგორც სპეციალისტები გვეუბნებიან, და ამის ყველა ნიშანი არსებობს, გამოიწვია უხვი ნალექის მოსვლამ. ამისგან დაზღვეული არავინ არ არის. ამ შემთხვევაში ჩვენი პასუხი უნდა იყოს, რომ გვქონდეს გამართული სწრაფი რეაგირების და ადრეული შეტყობინების სისტემები, რომლებიც საქართველოში გვაქვს ორი და უნდა გაკეთდეს ყველგან“, - განაცხადა ბახტაძემ.
ცნობისთვის, სოფელ ჭუბერში, სადაც ნენსკრაჰესს აშენებენ, სამაშველო სამუშაოები მთელი ღამის განმავლობაში მიმდინარეობდა.
უხვი ნალექის გამო მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.