რეგიონები

მაგნოლიას შეკვეთილში გადასატანად გზად ხეებს ჩეხავენ

აჭარიდან შეკვეთილში, კერძოდ, ყოფილი პრემიერ-მინისტრის, ბიძინა ივანიშვილის დენდროლოგიურ პარკში, მაგნოლიას ხის გადასატანი სამუშაოები დღესაც გრძელდება.

ტელეკომპანია რუსთავი 2-ის ინფორმაციით, ქობულეთში ბობოყვათის ტერიტორიაზე ამ წუთებში ასწლოვანი ევკალიპტის ხეების გაჩეხვა მიმდინარეობს. როგორც ადგილობრივები აცხადებენ, ხეების ტოტები ხელს უშლის მაგნოლიას ხის გამოტარებას, რომელიც ციხისძირიდან შეკვეთილში გადააქვთ.

ადგილობრივები მოჭრილი ხის ტოტებს აგროვებენ და სახლში მიაქვთ. რაც შეეხება მანქანას, რომელზეც მაგნოლიას ხე დგას, ის სავარაუდოდ, ევკალიპტის ხეების გაჩეხვის შემდეგ დაიძვრება.

ხეების გადატანაზე კვლავ კომპანია „ზიმო“ მუშაობს.

მაგნოლია რიგით მეორე გიგანტური ხეა, რომელიც ციხისძირიდან ამოთხარეს და ბიძინა ივანიშვილის სახლის მიმდებარე ტერიტორიაზე გადაიტანენ. შარშან თებერვალში ბიძინა ივანიშვილის დაკვეთით სამშენებლო კომპანია ,,ზიმომ“ ციხისძირიდან ურეკში ტიტას ჯიშის ხე გადარგო.