საზოგადოება

მაკა ასათიანმა ტელეკომპანია „მაესტროს“ კუთვნილი 25%-ანი წილი დათმო

ტელეკომპანია „მაესტროს“ 25%-ის მფლობელმა მაკა ასათიანმა საკუთარი წილი დათმო. როგორც მაკა ასათიანის ადვოკატმა გიორგი გვენეტაძემ მედიას განუცხადა, ასათიანი მოლაპარაკებებს ირაკლი რუხაძესთან აწარმოებდა.

გადაწყვეტილების მიღების მიზეზი კი გახდა ის, რომ მაკა ასათიანმა საკონტროლო პაკეტი დაკარგა, შესაბამისად, ვერ ახდენდა გადაწყვეტილებებზე გავლენას, ამიტომ ინტერესიც დაკარგა.

„მაკა ასათიანმა დაკარგა საკონტროლო პაკეტი, შესაბამისად, ვერ ახდენდა ვერავითარ გავლენას მისაღებ გადაწყვეტილებებზე. დაკარგა მან ინტერესი წილის ქონის მიმართ და ჩათვალა მიზანშეწონილად, რომ გაასხვისოს წილი. ირაკლი რუხაძესთან აწარმოებდა მოლაპარაკებას. მაკა ასათიანს ტელეკომპანიაში არანაირი წილი არ აქვს დარჩენილი“,-აღნიშნა ადვოკატმა.

შეგახსენებთ, რომ გუშინ გახდა ცნობილი, რომ მედიჰოლდინგმა „იმედმა“ ტელეკომპანია „მაესტროს“ საკონტროლო პაკეტის მფლობელი გახდა, გარდა ამისა, იგი ჯიდიესთანაც აწარმოებს მოლაპარაკებას ტელეკომპანიის ნაწილის შესყიდვასთან დაკავშირებით.

გუშინვე, ტელეკომპანია „მაესტროს“ დამფუძნებელმა და არხის 15%-ის მფლობელმა მამუკა ღლონტმა განაცხადა, რომ მას შემოუთვალეს, რომ „თუ არ მივყიდით წილებს, ისინი გაზრდიან საწესდებო კაპიტალს „მაესტროსი“და ჩვენ ამ ფორმით საერთოდ გაგვაგდებენ „მაესტროს“ დამფუძნებელთა რიგიდან“.

მონიკა დავლიანიძე