საზოგადოება

მედიაჰოლდინგმა „იმედმა“ კი არ იყიდა „მაესტრო“ და GDS, არამედ GDS-მა იყიდა „იმედი“ და „მაესტრო“ -მამუკა ღლონტი

ტელეკომპანია „მაესტროს“ დამფუძნებლის მამუკა ღლონტის განცხადებით, მედიაჰოლდინგმა „იმედმა“ კი არ იყიდა „მაესტრო“ და GDS, არამედ GDS-მა იყიდა „იმედი“ და „მაესტრო“.

ამის შესახებ ღლონტმა რუსთავი2-ის ეთერში მედიაჰოლდინგ „იმედის“ მიერ „მაესტროსა“ და GDS საკონტროლო პაკეტის შეძენის საკითხის კომენტირებისას განაცხადა.

„ეს გარიგება არ მოხდა არც გუშინ და არც დღეს. ეს გარიგება მოხდა არჩევნების წინ და ამის შესახებ მე სულ ვსაუბრობდი. სულ ვამბობდი, რომ „მაესტროს“ რეალური მყიდველი არის ირაკლი რუხაძე და ირაკლი რუხაძისა და „იმედის“ რეალური მყიდველი ვინ არის, ამის მიხვედრა ძნელი არ არის. მე ვიტყოდი, რომ„იმედმა“ კი არ შეიძინა „მაესტრო“ და ჯიდიესი, არამედ ჯიდიესმა შეიძინა „მაესტრო“ და „იმედი“,-აღნიშნა მამუკა ღლონტმა.

„მაესტროს“ დამფუძნებელი გარიგების უკან ხელისუფლებასა და ბიძინა ივანიშვილს, ხოლო გარიგების მიზანში კი, სახსრების ეკონომიას ხედავს.

„ანუ სამივე არხსზე საინფორმაციოს გაკეთება უჯდებათ ძვირი და ეს არის ერთ-ერთი ფორმა, რა ფორმითაც შეიძლება ჟურნალისტების გათავისუფლება სამსახურიდან. თორემ, ვისაც სჯერა რაღაც ჰოლდინგების და არხების გადარჩენების და ასე შემდეგ, გულწრფელად მეცოდება ასეთი ხალხი. სამის ნაცვლად გააკეთებენ ერთ საინფორმაციოს“,-აღნიშნა ღლონტმა.

მან ტელეკომპანია რუსთავი2- მიულოცა ის, რომ ტელევიზიის წართმევა დღის წესრიგში არ დგას.

„სხვათაშორის რუსთავი2-ს მინდა მივულოცო. ვინაიდან ამათმა ისეთი რაღაცა გააცხადეს, რაც ნიშნავს, რომ თქვენი ტელევიზიის წართმევა დღის წესრიგში აღარ არის. შემდეგი ეტაპი იქნება ის, რომ ცოტა ხანი შეისვენებენ და შემდეგ მისდგებიან ყველა იმ თავისუფალ მედიას, რომლებიც ასე თუ ისე რაღაც როლს თამაშობენ ქვეყანაში“,-განაცხადა მამუკა ღლონტმა.

მან ასევე პირდაპირ ეთერში პირველად განაცხადა, რომ „ამ გარიგების ავტორებმა შემომითვალეს, რომ თუ არ მივყიდით წილებს, ისინი გაზრდიან საწესდებო კაპიტალს „მაესტროსი“და ჩვენ ამ ფორმით საერთოდ გაგვაგდებენ „მაესტროს“ დამფუძნებელთა რიგიდან. პირველად ვაჟღერებ ამ ინფორმაციას.ბრძოლის უკვე ასეთ მეთოდზე მიდიან“,-განაცხადა მამუკა ღლონტმა.

მონიკა დავლიანიძე