მსოფლიო

“მე ჩემი არჩევანი გავაკეთე“ - ინგუშეთის პირველი პირი თანამდებობას ტოვებს

ინგუშეთის რესპუბლიკის ხელმძღვანელი იუნუს-ბეკ ევკუროვი თანამდებობას ტოვებს. მას გადადგომის კონკრეტული მიზეზი სპეციალურ ტელემიმართვაში არ დაუსახელებია, თუმცა აღნიშნა, ინგუშეთის მოსახლეობაში დაქსაქსულობა და ამ დაქსაქსულობაში ინგუშეთის ხელისუფლების, რელიგიური და საზოგადოებრივი ორგანიზაციების და კონკრეტულად საკუთარი პასუხისმგებლობაც აღიარა.

„მოვუწოდებ ყველა დაინტერესებულ მხარეს, გააკეთოს თავისი არჩევანი. მე ჩემი არჩევანი გავაკეთე“, – აღნიშნა ევკუროვმა.

შეგახსენებთ - იუნუს-ბეკ ევკუროვი ინგუშეთის სათავეში 2008 წლიდან დგას. 2018 წლის სექტემბერში ის რესპუბლიკის ხელმძღვანელად ხუთწლიანი ვადით ხელახლა აირჩიეს. მისი უფლებამოსილების ვადა 2023 წელს იწურებოდა.

2018 წლის შემოდგომას ინგუშეთი მასობრივი საპროტესტო გამოსვლების ტალღამ მოიცვა, რაც გამოწვეული იყო ინგუშეთსა და ჩეჩნეთს შორის საზღვრის შესახებ შეთანხმების ხელმოწერით. საპროტესტო გამოსვლების დროს სამართალდამცველებმა დემონსტრანტების დაშლა არაერთხელ სცადეს. დააკავეს საპროტესტო აქციების რამდენიმე ლიდერი, ინგუშეთის შს მინისტრმა კი თანამდებობა დატოვა.