საზოგადოება

მერაბიშვილი პოლიტიკურ ბატალიებში ჩართვას არ აპირებს - ოთარ კახიძე

„ევროპული საქართველოს“ წევრი და ვანო მერაბიშვილის ადვოკატის ოთარ კახიძის განცხადებით, ვანო მერაბიშვილი პოლიტიკურ ბატალიებში ჩართვას არ აპირებს. კახიძის თქმით, მერაბიშვილს პოლიტიკური ერთიანობის შენარჩუნების სურვილი აქვს.

„მან განაცხადა, რომ შეთანხმებული არ იყო მასთან მისი გენერალური მდივნად არჩევა ან გენერალურ მდივნად დატოვება , როგორც ამას განმარტავენ . სხვას მე ვერაფერს ვერ დავამატებ, რადგან არ შეიძლება პოლიტიკური პატიმრის სახელით სპეკულირება. როცა ვანო მერაბიშვილი თავად გადაწყვეტს, მაშინ გააკეთებს შესაბამის განცხადებას“,- ამბობს კახიძე.

ვანო მერაბიშვილი მისი „ნაციონალური მოძრაობის“ გენერალურ მდივნად დანიშვნის შესახებ თავის ფეისბუქის გვერდზე გამოეხმაურა.

„მინდა გაცნობოთ, რომ დღეს გამართული „ერთიანი ნაციონალური მოძრაობის“ ყრილობაზე, პარტიის გენერალურ მდივნად არჩევაზე მე თანხმობა არ განმიცხადებია“, - დაწერა მერაბიშვილმა.

თვითონ ნაციონალურ მოძრაობაში ამბობენ, რომ პარტიის წარმომადგენელი მერაბიშვილს უახლოეს მომავალში შეხვდება.

კახიძემ ჟურნალისტებთან საუბარში დაამატა, რომ მან მერაბიშვილთან ადამიანის უფლებათა ევროპულ სასამართლოში გასამართ პროცესზეც იმსჯელა.

ანა მებურიშვილი