საზოგადოება

მერია ,,ბავშვთა სამყაროს’’ დაზარელებულ მოვაჭრეებს ფინანსურად არ დაეხმარება

თბილისის ვიცე-მერის, ლაშა აბაშიძის განცხადებით, ,,ბავშვთა სამყაროს’’ ტერიტორიაზე მიმდინარეობს სამუშაოები, რათა მოვაჭრეებმა საცავებში დაცული მათი კუთვნილი ძვირფასეულობის გამოტანა შეძლონ.

,,გამოძიებისგან კონკრეტული ინფორმაცია ჯერ არ არის. მიმდინარეობს გამოძიება. ჩვენ დილიდან ჩავატარეთ გარკვეული სამუშაოები. სპეციალური დამჭერები მაგრდება და გამაგრებითი სამუშაოები მიმდინარეობს, რომ მოხდეს ხალხის შეყვანა და მოხდეს საცავებიდან მათი ნივთების გამოტანა.

ჩვენი მთავარი ამოცანა, პირველი პრიორიტეტი იყო, რომ ის რაც იყო გადარჩენილი, გამოვიტანოთ. მათ საცავებში რაც არის დაცული, ჩვენ გვინდა, რომ მაქსიმალურად ოპერატიულად უზრუნველვყოთ მათი გამოტანა.

მეორე პრიორიტეტი არის, რომ ამ ადამიანებმა გააგრძელონ მუშაობა, სხვადასხვა ადგილებში მოხდეს მათი გადანაწილება და ჩვენ ამაში დავეხმარებით.

მესამე კი, როგორც იცით, მათ აქვთ გარკვეული საბანკო ვალდებულებები და როგორც ბანკებიდან ასევე, მიკროსაფინანსო ორგანიზაციებიდან და ეროვნულმა ბანკმა და ჩვენც ერთობლივად განვაცხადეთ, რომ ვუშუამდგომლებთ მათ, რათა დაწესდეს გარკვეული შეღავათები’’, - განაცხადა ტელეკომპანია ,,იმედის’’ პირდაპირ ეთერში ჩართვისას თბილისის ვიცე-მერმა.

რაც შეეხება კითხვას, მერიის ბიუჯეტიდან გამოიყოფა თუ არა დაზარალებულთა დასახმარებლად სახსრები, ლაშა აბაშიძის თქმით, მერიის ფინანსები არ დაიხარჯება.

,,ძვირფასი ლითონები, რაც არის საცავში, არის გადარჩენილი, სხვა დანარჩენი სავარაუდოდ არის განადგურებული, მაგრამ ჩვენი მაქსიმალური ძალისხმევა მიმართული იქნება იმისკენ, რომ ამ ადამინებს შევუმსუბუქოთ ვალდებულებები როგორც საბანკო ნაწილში, ისე საქმიანობის ნაწილში, რომ მათ გააგრძელონ საქმიანობა და გადავანაწილოთ სხვადასხვა ბაზრობაზე. ამაზე ჩვენ გვქონდა კომუნიკაცია ბაზრობების მფლობელებთან და ჩვენ ვუშუამდგომლებთ იმაზე, რომ ეს ხალხი გადავანაწილოთ იქ’’, - განაცხადა ლაშა აბაშიძემ.

თბილისის ვიცე-მერის თქმითვე, აუცილებელია, რომ მსხვილ სავაჭრო ობიექტებში მოხდეს საქონლის დაზღვევის პირობის შემოღება.

,,ასეთი მასშტაბური ვაჭრობა სადაც იმართება და ასეთი მოძრაობა სადაც არის, მიგვაჩნია, რომ აუცილებელი უნდა იყოს დაზღვევის პირობის შემოღება. ასეთი ფორსმაჟორული გარემოებები უნდა იქნას დაზღვეული, რათა არ მოხდეს კიდევ ისე, რომ თვითონ მოვაჭრეებს დააწვეთ ეს ზარალი ისევ თავის თავზე’’, - განაცხადა ლაშა აბაშიძემ.

ნინო ექვთიმიშვილი