პოლიტიკა

მესაზღვრეს არ ჰქონდა არანაირი საფუძველი, რომ ვლადიმერ მამონტოვი საქართველოს ტერიტორიაზე არ შემოეშვა - შსს

საქართველოს შინაგან საქმეთა სამინისტროს განცხადებით, რუსი ჟურნალისტის ვლადიმერ მამონტოვის წინააღმდეგ „ოკუპირებული ტერიტორიების შესახებ“ კანონის დარღვევის გამო გამოძიება ვერ დაიწყება. უწყების თქმით, აღნიშნულ კანონდარღვევას ხანდაზმულობის 6-წლიანი ვადა ამოეწურა.

„ოკუპაციის შესახებ კანონის თანახმად, აღნიშნულ დანაშაულს აქვს ხანდაზმულობის 6- წლიანი ვადა. შესაბამისად, ამ პირის მიმართ გამოძიება ვერ დაიწყებოდა. ჩვენთვის არ არის ცნობილი ოკუპირებული აფხაზეთის ტერიტორიაზე მამონტოვის 2009 წლის შემდეგ შესვლის თაობაზე.

რაც შეეხება ოკუპაციის შესახებ კანონს, აღნიშნული კანონი არ ითვალისწინებს პირის საზღვრიდან გაბრუნებას. ამ კანონის შესაბამისად, თუ პირს დარღვეული აქვს „ოკუპირებული ტერიტორიების შესახებ“ კანონი, დაუყონებლივ უნდა დაიწყოს გამოძიება და პირი მიეცეს პასუხისგებაში. სასჯელის სახეს მოსამართლე თავად განსაზღვრავს (ჯარიმა ან პატიმრობა).

როგორც გადავამოწმეთ, ვლადიმერ მამონტოვი 2009 წელს „ოკუპირებული ტერიტორიების შესახებ“ კანონის დარღვევის გამო საზღვრიდან არ გაუბრუნებიათ. ამ კანონის შესაბამისად, მის მიმართ უნდა დაწყებულიყო სისხლის სამართლებრივი დევნა, რაც მაშინ არ მომხდარა. ამას გარდა, მამონტოვს პასპორტში არ ჰქონდა შესაბამისი შტამპი, რომელიც დაადასტურებდა, რომ ის ოკუპირებული აფხაზეთის ტერიტორიაზე იყო ნამყოფი. შესაბამისად მესაზღვრეს არ ჰქონდა არანაირი საფუძველი, რომ აღნიშნული პირი საქართველოს ტერიტორიაზე არ შემოეშვა“, - განაცხადეს შსს-ში.

რუსული საინფორმაციო სააგენტოს „ლაპარაკობს მოსკოვი“ მთავარი რედაქტორი ვლადიმერ მამონტოვი 2009 წელს გააბრუნეს საქართველოდან „ოკუპირებული ტერიტორიების შესახებ“ კანონის დარღვევის გამო.

რუსთავი 2-ის ინფორმაციით, მამონტოვი თბილისში იმყოფება, სადაც მედიაკონფერენციას ესწრება.