კომენტარი

მიხეილ გიორგაძე მსახიობებისთვის ხელფასების შემცირებაზე პასუხისმგებლობას თეატრების ხელმძღვანელობას აკისრებს

როგორ გაუმკლავდებოდნენ თეატრები წლიური ბიუჯეტის ჯამურად შემცირებას, ეს თავად ხელმძღვანელის პრეროგატივაა და ინდივიდუალური გადასაწყვეტი იყო, - განუცხადა ჟურნალისტებს კულტურისა და ძეგლთა დაცვის მინისტრმა, მიხეილ გიორგაძემ მსახიობებისთვის ხელფასების შემცირებაზე დასმული კითხვის საპასუხოდ.

მინისტრის ინფორმაციით, მსახიობებისთვის ხელფასების შემცირება არ მომხდარა ყველა თეატრში.

"რაც შეეხება მსახიობების ხელფასების შემცირებას, ეს არ მომხდარა ყველა თეატრში. თუ როგორ გაუმკლავდებოდნენ თეატრები წლიური ბიუჯეტის ჯამურად შემცირებას, ეს თვითონ ხელმძღვანელის პრეროგატივა და ინდივიდუალური გადასაწყვეტი იყო. ზოგმა ეს პრობლემა გადაწყვიტა ადმინისტრაციული ან სხვადასხვა ხარჯების შემცირების მეშვეობით და ხელფასები არ შეუმცირა მსახიობებს. ზოგმა შეუმცირა იმ მსახიობებს, ვინც ნაკლებად ან საერთოდ არ იყვნენ დაკავებული სპექტაკლებში. ზოგმა მიიღო გადაწყვეტილება, რომ ყველასთვის შეემცირებინა", - განაცხადა მინისტრმა.

ნინო ექვთიმიშვილი