პოლიტიკა

მიხეილ სააკაშვილის დაკავებისთვის საკმარისი საფუძველი არ არსებობს - არტიომ შევჩენკო

უკრაინის შინაგან საქმეთა სამინისტროს კომუნიკაციის დეპარტამენტის ხელმძღვანელის, არტიომ შევჩენკოს განცხადებით, საქართველოს ექს-პრეზიდენტი და ოდესის ყოფილი გუბერნატორი მიხეილ სააკაშვილი უკრაინაში უკანონოდ იმყოფება, თუმცა მისი დაკავების საფუძველი არ არსებობს.

„მოცემულ მომენტში ბატონი სააკაშვილი უკრაინაში უკანონოდ იმყოფება. სასაზღვრო სამსახურის თანამშრომლებმა მას ადმინისტრაციული სამართალდარღვევის შესახებ პროტოკოლი უკვე გადასცეს, თუმცა მისი დაკავებისთვის საკმარისი საფუძველი არ იყო“, -თქვა შევჩენკომ.

შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

გუშინ ლვოვში, სასტუმრო ლეოპოლისის წინ სააკაშვილმა ხელი მოაწერა ადმინისტრაციული სამართალდარღვევათა პროტოკოლს უკრაინის საზღვრის უკანონოდ გადაკვეთის შესახებ. მისი საქმის სასამართლო განხილვა 18 სექტემბერს გაიმართება.

ანა მებურიშვილი