რეგიონები

მყინვარის დნობასთან ერთად უხვნალექიანობამ გამოიწვია მდინარის დონის მკვეთრი მატება - ნინო თანდილაშვილი

გარემოს დაცვისა და სოფლის მეურნეობის მინისტრის მოადგილის, ნინო თანდილაშვილის ინფორმაციით, სოფელ ჭუბერში მდინარე ნენსკრას ადიდება მყინვარის დნობამ გამოიწვია.

მისივე თქმით, მიუხედავად იმისა, რომ სტიქიის პიკმა ჩაიარა, მოსალოდნელია, რომ სიტუაცია გართულდეს.

„ადგილი ჰქონდა მასიური ქანების წამოსვლას და მყინვარის დნობასთან ერთად უხვნალექიანობამ გამოიწვია მდინარის დონის მკვეთრი მატება, რაც ამ სტიქიის შედეგებამდე მიგვიყვანა. დღესდღეობით ჩვენი სპეციალისტები იმყოფებიან ადგილზე, აგრძელებენ საველე კვლევით სამუშაოებს. მინდა გითხრათ, რომ სტიქიის პიკი ამ ეტაპის მდგომარეობით არის გავლილი, თუმცა უხვნელექიანობის შემთხვევაში, ცხადია, შესაძლოა, ჩვენ ველოდოთ გართულებებს. ამის თაობაზე ჩვენი სპეციალისტები მუშაობენ“, -განაცხადა თანდილაშვილმა.

ცნობისთვის, უხვი ნალექის გამო გუშინ მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.