საზოგადოება

მოსახლეობისთვის ყველაზე მნიშვნელოვან საკითხს დასაქმება წარმოადგენს - NDI

ეროვნულ-დემოკრატიული ინსტიტუტის (NDI-ის) უახლესი კვლევის თანახმად, უმრავლესობისთვის მნიშვნელოვანი ეროვნული საკითხები ეკონომიკური ხასიათისაა.

კითხვაზე, თქვენი და თქვენი ოჯახისთვის რომელი ეროვნული საკითხია ყველაზე მნიშვნელოვანი, მოქალაქეებს სამი პასუხი უნდა გაეცათ.

მონაცამების თანახმად, გამოკითხულთა 54%-მა მათთვის და მათი ოჯახებისთვის ყველაზე მნიშვნელოვან ეროვნულ საკითხად სამუშაო ადგილები დაასახელა, 35%-მა - ფასების ზრდა/ინფლაცია, 30%-მა - სიღარიბე, 25%-მა - პენსიები, 23%-მა - ხელმისაწვდომი ჯანდაცვა, ხოლო 23%-მა - ტერიტორიული მთლიანობა.

ყველაზე ნაკლებმნიშვნოლავან ეროვნულ საკითხებად გამოკითხულებმა ციხეების/პატიმრების საკითხი (1%-ზე ნაკლებმა გამოკითხულმა დაასახელა) და უმცირესობათა უფლებები (1%) დაასახელეს.

NDI-ის ინფორმაციით, მოსახლეობისთვის ყველაზე მნიშვნელოვან საკითხთა ჩამონათვალი 2009 წლიდან არ შეცვლილა.

UK aid-ის ფინანსური ხელშეწყობით კვლევა NDI-ის დაკვეთით CRRC საქართველომ ჩაატარა. წარმომადგენლობითი შერჩევით (ოკუპირებული ტერიტორიების გარდა) კვლევა 29 ნოემბრიდან 19 დეკემბრამდე პერიოდში ჩატარდა, პირისპირ ინტერვიუთი გამოიკითხა 2 298 ადამიანი (გამოპასუხება 48%). კვლევაში მონაწილე პირები შემთხვევითი შერჩევის მეთოდით შეირჩნენ, ცდომილება კი - 1,9 %-ია.