პოლიტიკა
მოვუწოდებ ჩვენი ქვეყნის თითოეულ მოქალაქეს, რომ ნუ გავწირავთ ქვეყნის უდიდეს მიღწევას, რასაც უვიზო მიმოსვლა ჰქვია - თეა წულუკიანი
იუსტიციის მინისტრი, თეა წულუკიანი გამოეხმაურა ინფორმაციას გერმანიის საზღვრიდან საქართველოს 19 მოქალაქის უკან გამობრუნების შესახებ. უწყების ხელმძღვანელის ვარაუდით, გამობრუნებულმა პირებმა ვერ დაარწმუნეს მესაზღვრეები მათი ვიზიტის კეთილ განზრახვაში.
წულუკიანის თქმით, უვიზო მიმოსვლის ამოქმედების შემდეგ საქართველოს ზოგიერთი მოქალაქე ამით ბოროტად სარგებლობს, ამიტომ მინისტრმა მოუწოდა მოქალაქეებს, გაუფრთხილდენ ქვეყნის ამ მიღწევას და დაიცვან ვიზალიბერალიზაციასთან დაკავშირებული ყველა წესი.
„სამწუხაროდ, ჩვენი ქვეყნის არაერთი მოქალაქე არაკეთილსინდისიერად იყენებს იმ უდიდეს მიღწევას, რასაც შენგენის სივრცეში საქართველოს მოქალაქეებისთვის უვიზო მიმოსვლის რეჟიმი ჰქვია. შემიძლია, ვივარაუდო, რომ გამობრუნებული პირები სწორედ არიან იმ მიზეზით გამობრუნებული, რომ მათ გერმანელი, თუ სხვა ევროპელი მესაზღვრეები ვერ დაარწმუნეს, რომ კეთილი მიზნებისთვის ცდილობდნენ შენგენის სივრცეში შეღწევას.
შემიძლია, კიდევ ერთხელ მოვუწოდო ჩვენი ქვეყნის თითოეულ მოქალაქეს, რომ ნუ გავწირავთ ქვეყნის უდიდეს მიღწევას, მე ვიტყოდი, ისტორიულ მიღწევას, რასაც ევროპასთან უვიზო რეჟიმი ჰქვია. მოვუფრთხილდეთ, რადგან ასეთი მიღწევები მრავალი თაობის შრომის შედეგია და ჩვენი ქვეყნის ხელის წამოკვრით ნუ მოვეპყრობით ძალიან დიდ წარმატებას. მე ეს ადრეც ვთქვი და ჩემთვის გაუგებარი კრიტიკა დავიმსახურე, რომ რამდენიმე არაკეთილსინდისიერი ადამიანის ქცევამ, შეიძლება მოიტანოს – მეთქი ქვეყნისთვის არასასურველი შედეგი. დღევანდელი ახალი ამბავიც ამას ადასტურებს. მათ შორის გერმანიის ერთ-ერთი ფედერალური ხელისუფლებისადმი მიმართვები, რომ მათ აქვთ იმის აღქმა, საქართველოს მოქალაქეები კარგად არ იქცევიან და შესაბამისად, შეიძლება გარკვეული ზომების მიღებაც მოითხოვონ. ამიტომ, გავფრთხილდეთ და დავიცვათ ის კანონი, რომელი ქვეყნის სივრცეში შეღწევასაც ვცდილობთ“, -თქვა წულუკიანმა.
2 დღის წინ ქუთაისი-მენინგემის ავიარეისის რამდენიმე მგზავრი გერმანიის ტერიტორიაზე არ შეუშვეს. გერმანიაში შესვლაზე ბორტზე მყოფ 19 მგზავრს საბუთებში არსებული პრობლემების გამო უარი უთხრეს.