მსოფლიო

მოვუწოდებთ რუსეთს, რომ თავიანთი ძალები თქვენი ქვეყნის ტერიტორიიდან გაიყვანოს - იენს სტოლტენბერგი

საქართველოს პრემიერ-მინისტრი 18-20 ივლისს სამუშაო ვიზიტით ბრიუსელში იმყოფებოდა.

ვიზიტი ნატო-ს გენერალურ მდივან იენს სტოლტენბერგთან შეხვედრით დაიწყო, რის შემდეგაც მხარეებმა მედიისთვის განცხადებები გააკეთეს.

იენს სტოლტენბერგმა კიდევ ერთხელ მკაფიოდ განაცხადა, რომ ნატო სრულ მხარდაჭერას უცხადებს საქართველოს ევროატლანტიკურ მისწრაფებებს. გენერალურმა მდივანმა ხაზი გაუსვა საქართველოს უმნიშვნელოვანეს წვლილს ნატო-ს მისიებსა და ოპერაციებში, აგრეთვე, ყურადღება გაამახვილა ქვეყნის მიერ განხორციელებულ წარმატებულ რეფორმებზე და აღნიშნა, რომ გრძელდება მუშაობა საქართველოს ნატო-ს წევრობისთვის მოსამზადებლად.

იენს სტოლტენბერგმა ისაუბრა ნატო-საქართველოს ერთობლივი წვრთნის მნიშვნელობაზე, არსებით პაკეტსა და შავი ზღვის აუზში თანამშრომლობის გაძლიერების საკითხებზე.

„ნატო ერთიანია საქართველოს უსაფრთხოებისა და საერთაშორისოდ აღიარებული საზღვრების ფარგლებში მისი ტერიტორიული მთლიანობის მხარდაჭერის საკითხში, რაც აფხაზეთისა და სამხრეთ ოსეთის რეგიონებს მოიცავს. მოვუწოდებთ რუსეთს, რომ თავიანთი ძალები თქვენი ქვეყნის ტერიტორიიდან გაიყვანოს,“- განაცხადა იენს სტოლტენბერგმა ერთობლივი პრესკონფერენციისას.