საზოგადოება

მთაწმინდაზე ხანძარი ლიკვიდერებულია - დამწვარია 2 ჰექტრამდე მიწის ფართობი

საგანგებო სიტუაციების მართვის სააგენტოს თბილისის სამმართველოს უფროსის მოადგილის დავით გელაშვილის განცხადებით, მთაწმინდის ფერდობზე ხანძარი სრულადაა ლიკვიდირებული. დამწვარია 2 ჰექტრამდე მიწის ფართობი.

ხანძრის ზონაში მეხანძრეები მთელი ღამის განმავლობაში მუშაობდნენ.

„მთელი ღამის განმავლობაში ადგილზე რჩებოდა საგანგებო სიტუაციების მართვის სააგენტოს დანაყოფები, კერძოდ 5 ერთეული სახანძრო ტექნიკა, 30-მდე მეხანძრე მაშველი, რომლებიც პრევენციის მიზნით ატარებდნენ ღონისძიებებს, რომლებიც მიმართული იყო დარჩენილი კერების დასაქრობად. ამ მომენტისთვის, აბსოლუტურად არც ერთი კერა არ არსებობს ხანძრის ზონაში. შეგვიძლია ვთქვათ, რომ ხანძარი სრულადაა ლიკვიდირებული“, - განაცხადა დავით გელაშვილმა.

მისივე ინფორმაციით, ხანძარი გუშინ ღამით ვერის სასაფლაოს მიმდებარე ტერიტორიიდან დაიწყო და ზემოთ გავრცელდა.

„არის ძალიან რთული რელიეფური პირობები, იყო ცუდი მეტეოროლოგიური პირობებიც - მხედველობაში მაქვს ძლიერი ქარი. იქმნებოდა საშიშროება, რომ ხანძარი გავრცელებულიყო პარკის ტერიტორიაზე, ასევე მოსახლეობაში, მაგრამ აქვე უნდა აღვნიშნო, რომ მეხანძრეების მყისიერმა ჩარევამ, მათმა პროფესიონალიზმმა განაპირობა ის, რომ მივიღეთ მინიმალურ ფართობზე გავრცელება და უმოკლეს დროში ხანძრის ლიკვიდაცია. ხანძრის გაჩენის მიზეზს ვერ მოგახსენებთ, მიზეზს და ზარალს შესაბამისი ორგანოები დაადგენენ“, - განაცხადა დავით გელაშვილმა.

ხანძართან დაკავშირებით, შსს-ს თბილისის პოლიციის დეპარტამენტის ძველი თბილისის სამმართველომ გამოძიება სისხლის სამართლის კოდექსის 188-ე მუხლის მეორე ნაწილით დაიწყო.