კომენტარი

მთავარ გამოწვევად რჩება სოციალურად მოწყვლადი მოსახლეობისთვის ამბულატორიულ მედიკამენტებზე ხელმისაწვდომობა - დავით სერგეენკო

შრომის, ჯანმრთელობისა და სოციალური დაცვის მინისტრმა 2016 წელი შეაჯამა და მთავარ გამოწვევად სოციალურად მოწყვლადი მოსახლეობისთვის ამბულატორიულ მედიკამენტებზე ხელმისაწვდომობა დაასახელა.

„მთავარი იყო ის, რომ საყოველთაო ჯანდაცვა, რომელიც ჯანდაცვის სისტემის ერთ-ერთი გამორჩეული მიღწევაა, შეფერხების გარეშე განხორციელდა. ასევე მოხდება მომავალშიც. წლის განმავლობაში დაიგეგმა ისეთი რეფორმები, რომელიც უკვე მომავალი წლის იანვრიდან განხორციელდება, რომლის ამოცანაც იქნება ხარისხზე უფრო მეტი მიწვდომადობა. რჩება მთავარი გამოწვევები, რაც არის სოციალურად მოწყვლადი მოსახლეობისთვის ამბულატორიულ მედიკამენტებზე ხელმისაწვდომობა. შეჯამება ასეთი იქნება – წლის განმავლობაში ჯანდაცვის სისტემის სტაბილურობა, ახალი რეფორმებისთვის საფუძვლის ჩაყრა, ხოლო ერთი მთავარი გამოწვევა ამბულატორიულ მედიკამენტებზე გართულებული წვდომაა“, - განაცხადა დავით სერგეენკომ.

მინისტრმა სოციალური მუშაკები და სოციალური სააგენტოს თანამშრომლები დააჯილდოვა. სერგეენკოსგან მადლობის სიგელები ადგილობრივმა და საერთაშორისო არასამთავრობო ორგანიზაციებმაც მიიღეს.

,,სოციალური პოლიტიკის განხორციელებაში მნიშვნელოვანია, როგორც თანამშრომლობა ასევე, იმ გამორჩეული სისტემის თანამშრომლების წახალისება, რომელთაც განსაკუთრებული დამსახურება აქვთ. ჩვენ დღეს გვქონდა პატივი, რომ მადლობა გადაგვეხადა და მცირედი სამახსოვრო მადლობის სიგელები გადაგვეცა როგორც სისტემაში მომუშავე გამორჩეული თანამშრომლებისათვის, სოციალური მუშაკებისთვისაც, ვისაც გამორჩეული შედეგები ჰქონდა,“ - განაცხადა სერგენკომ.

ნინო ექვთიმიშვილი