სამართალი

ნარკორეალიზაციისთვის დაკავებული 8 პირისთვის საქართველოს მთავარი პროკურატურა პატიმრობის შეფარდებას ითხოვს

საქართველოს მთავარმა პროკურატურამ შაბათ გამთენიისას ჩატარებული სპეცოპერაციის შედეგად დაკავებული 8 პირის აღკვეთის ღონისძიების საკითხზე თბილისის საქალაქო სასამართლოს მიმართა. ბრალდების მხარე მათთვის პატიმრობის შეფარდებას ითხოვს.

სასამართლო პროცესი დღეს, 11:30 საათზე გაიმართება. აღკვეთის ღონისძიების საკითხს მოსამართლე დავით კურტანიძე განიხილავს. საქმის მასალები უკვე გადასცეს ბრალდებული პირების ადვოკატებსაც.

შსს-მ 12 მაისს, გამთენიისას კლუბებში „ბასიანსა“ და „გალერიში“ სპეცოპერაცია ჩაატარა. უწყების ინფორმაციით, ჩატარებული საგამოძიებო მოქმედებების შედეგად, სულ დაკავებულია 8 ნარკორეალიზატორი, რომელთა მიერ კლუბში ნარკოტიკული საშუალების გასაღების თითოეულ ფაქტზე პოლიციას გააჩნია მოსამართლის განჩინების საფუძველზე განხორციელებული ვიდეოჩანაწერი.

შსს-ის ინფორმაციით, პოლიციის მიერ დაკავებულია: 1988 წელს დაბადებული ვ.ჟ., 1992 წელს დაბადებული ლ.მ., 1996 წელს დაბადებული ქ.მ., 1997 წელს დაბადებული მ.მ., 1995 წელს დაბადებული ბ.დ., 1994 წელს დაბადებული თ.ჩ., 1994 წელს დაბადებული ჯ.ე. და 1988 წელს დაბადებული გ.მ.