პოლიტიკა

ნათია მეზვრიშვილის ინფორმაციით, ცეცხლსასროლი იარაღის უკანონოდ შეძენა-შენახვა-ტარება მძიმე კატეგორიის დანაშაული გახდება

შინაგან საქმეთა მინისტრის მოადგილის, ნათია მეზვრიშვილის ინფორმაციით, ცეცხლსასროლი იარაღის უკანონოდ შეძენა-შენახვა-ტარება მძიმე კატეგორიის დანაშაული იქნება და მასზე მხოლოდ თავისუფლების აღკვეთა გავრცელდება.

როგორც მეზვრიშვილმა ჟურნალისტებს უთხრა, ცვლილებები განაპირობა ცეცხლსასროლი იარაღის მართლსაწინააღმდეგო შეძენა-შენახვა-ტარებისა და ამით დანაშაულის ჩადენის გახშირებულმა ფაქტებმა.

„მკაცრდება სანქციები ცეცხლსასროლი იარაღის შეძენა-შენახვა-ტარებისათვის. ტარება ხდება მძიმე კატეგორიის დანაშაული, რომელიც საკმაოდ მკაცრად დაისჯება, სანქცია იქნება თავისუფლების აღკვეთა. ასევე სისხლის სამართლის კოდექსის მოქმედი რედაქციიდან განსხვავებით, მძიმე კატეგორიის დანაშაული ხდება ცეცხლსასროლი იარაღის შეძენა-შენახვა და ეს ქმედებაც საკმაოდ მკაცრად დაისჯება“, – თქვა მეზვრიშვილმა.

სისხლის სამართლოს კოდექსში დაგეგმილი ცვლილებებით, ცეცხლსასროლი იარაღის შეძენა ან შენახვა გამოიწვევს თავისუფლების აღკვეთას ვადით 3-დან 6 წლამდე, ხოლო ცეცხლასროლი იარაღის ტარება დაისჯება 4-დან 7 წლამდე პატიმრობით.

ცვლილებები დღეს იურიდიულ საკითხთა კომიტეტმა უკვე განიხილა.