კონფლიქტის ზონა

ნატო-ს მოწოდებებმა საქართველოს მხარდაჭერის შესახებ უკვე დიდი ხანია, რიტუალური ხასიათი მიიღო - ოკუპირებული სამხრეთ ოსეთის ე.წ. საგარეო უწყება

„ნატო-ს ქვეყნების კონსოლიდირებულმა პოზიციამ სამხრეთ ოსეთისა და აფხაზეთის მიმართ , რომელსაც ახლავს განცხადებები საქართველოს მხარდაჭერის შესახებ, უკვე დიდი ხანია აუცილებელი რიტუალის ხასიათი მიიღო“, - ასე გამოეხმაურა ოკუპირებული სამხრეთ ოსეთის ე.წ. საგარეო საქმეთა სამინისტრო ნატო-ს გენერალური მდივნის, იენს სტოლტენბერგის განცხადებას, რომ რუსეთმა უკან უნდა წაიღოს თავისი გადაწყვეტილება სამხრეთ ოსეთისა და აფხაზეთის დამოუკიდებლობის შესახებ. სტოლტენბერგმა ასევე მოუწოდა რუსეთს, გაიყვანოს სამხედრო კონტინგენტი ოკუპირებული რეგიონებიდან.

„ნატო-ს ქვეყნების კონსოლიდირებული პოზიცია სამხრეთ ოსეთისა და აფხაზეთის მიმართ კარგადაა ცნობილი და მსგავსმა მოწოდებებმა, რომლებსაც ახლავს ტრადიციული განცხადებები საქართველოს მხარდაჭერისა და მისი ნატო-ში გაწევრინებისკენ მისწრაფების შესახებ, უკვე დიდი ხანია, მიიღო აუცილებელი რიტუალის ხასიათი“, - წერია დე-ფაქტო საგარეო უწყების განცხადებაში.

ოსური მხარის მტკიცებით, „სამხრეთ ოსეთსა და რუსეთს შორის დამყარებული სახელმწიფოთაშორისი უერთიერთობები საერთაშორისო სამართლის პრინციპებთან და ნორმებთან სრულ შესაბამისობაშია“.

ოკუპირებული ცხინვალის ე.წ. საგარეო უწყების განცხადებით, „აგრესიული, შეთანხმების უნარმოკლებული და შიდა პოლიტიკის მხრივ არასტაბილური მეზობელი სახელმწიფოსგან“ თავდასაცავად საჭიროა „რუსეთის ფედერაციის სამხედრო ყოფნა“ სამხრეთ ოსეთში.

„იმ პირობებში, როდესაც საქართველო უარს ამბობს, ხელი მოაწეროს შეთანხმებას ძალის გამოუყენებლობის შესახებ და ცდილობს, თავისი აგრესიის შედეგები საქართველო-რუსეთის ურთიერთობების სიბრტყეში გადაიყვანოს, სამხრეთ ოსეთი უფლებას იტოვებს, უზრუნველყოს თავისი უსაფრთხოება და გააძლიეროს რუსეთთან ერთად ერთიანი თავდაცვითი სივრცე“, - ნათქვამია განცხადებაში.