საზოგადოება

ნაციონალურმა მოძრაობამ აქციისთვის მხოლოდ 400 კაცის შეგროვება მოახერხა - სოზარ სუბარი

საქართველოს ლტოლვითა და განსახლების მინისტრის სოზარ სუბარის განცხადებით, ორკვირიანი სრული მობილიზების შემდეგ, ნაციონალურმა მოძრაობამ მხოლოდ 400 კაცის შეგროვება მოახერხა, რომლებიც სამინისტროსთან დაანონსებულ აქციებში მიიღებენ მონაწილეობას.

ამის შესახებ სუბარმა მთავრობის სხდომის დასრულების შემდეგ მედიას განუცხადა.

მისი თქმით, კარგი იქნებოდა, რომ ნაციონალურ მოძრაობას იმ ტერიტორიებზე გაემართათ აქციები, რომლებიც თავად რუსეთს ჩააბარეს.

„ორკვირიანი სრული მობილიზებით, ლამის სამხედრო რეჟიმზე გადავიდნენ და მოახერხეს, რომ 400-კაციანი სია შექმნეს, ვის მოყვანასაც აპირებენ აქციაზე. დიდი წარმატებაა ნაციონალური მოძრაობისთვის, ვულოცავ. ამ 400-კაციანი სიიდან რამდენი მოვა, ჯერ არ ვიცი. ისე, კარგი იქნებოდა, თუ აქციებს გეგმავენ, აქციები გაეკეთებინათ იმ ტერიტორიებზე, რომლებიც მოღალატეობრივად ჩააბარეს რუსეთს. ახალგორში მაგალითად,რომელიც ჯერ გამოყვეს მცხეთა-მთიანეთიდან, შემდეგ შეუერთეს ე.წ სამხრეთ ოსეთის ავტონომიურ ოლქს და შემდეგ ჩააბარეს რუსეთს. კოდორის ხეობიდან, რომელშიც სამხედრო ჯარი შეიყვანეს, საკუთარი ტერიტორიის დაპყრობის იმიტაცია გაითამაშეს, შემდეგ კი ჩააბარეს რუსეთს. აი, იქ რომ გააკეთონ აქციები, ეს იქნებოდა ბევრად უკეთესი და მაშინ დავიჯერებდი, რომ მათ მართლაც სტკივათ საქართველო“,-აღნიშნა მინისტრმა.

რაც შეეხება დევნილების 45-ლარიან სახელმწიფო დახმარებას, სოზარ სუბარის თქმით, დამხარების მოხსნა სტატუსის მოხსნას არ შეეხება.

„დევნილების დახმარება არ შეეხება დევნილის სტატუსს, და დევნილის სტატუსი, როგორც პოლიტიკური სტატუსი, რჩება მუდმივად, სანამ არ მოხდება დაბრუნება, მიუხედავად იმისა, რომ ბოლო 10 თუ 15 წელია საერთაშორისო ორგანიზაციები ითხოვენ, რომ ეს მოვიყვანოთ საერთაშორისო სტანდარტთან შესაბამისობაში და საერთაშორისო სტანდარტი არის ის, რომ, ასეთი სტანდარტი არ არსებობს“,-განმარტა მინისტრმა.

შეგახსენებთ, რომ გასულ კვირას სოზარ სუბარმა განაცხადა, რომ დევნილთა უწყებაში რეფორმა იგეგმება, რომლის მიხედვით, დევნილთა ნაწილს 45-ლარიანი სახელმწიფო დახმარება მოეხსნება. მინისტრმა ხაზი გაუსვა, რომ შეზღუდვა მაღალშემოსავლიან დევნილებს შეეხება.

თუმცა, ნაციონალური მოძრაობა ეჭვობს, რომ რეფორმა დევნილებისთვის სტატუსის მოხსნასაც ითვალისწინებს, ამიტომ დღეიდან, პარტიის წევრები და აფხაზთა კრებაში შემავალი დევნილთა არასამთავრობო ორგანიზაციები, სამინისტროსთან პერმანენტულ აქციებს იწყებენ.

მონიკა დავლაინიძე