კომენტარი

ნებისმიერ დროს მზად ვართ, რომ ვუმასპინძლოთ საქართველოს პრეზიდენტს - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, საკანონმდებლო ორგანო მზადაა პრეზიდენტს ნებისმიერ დროს უმასპინძლოს.

როგორც კობახიძემ ჟურნალისტებს განუცხადა, პარლამენტი პრეზიდენტის ყოველწლიური მოხსენებით გამოსვლის თარიღთან დაკავშირებით, პრეზიდენტის შეთავაზებას ელოდება.

„ეს არის პრეზიდენტის მოხსენება, შესაბამისად, ინიციატივა არის მის მხარეს. მან უნდა შემოგვთავაზოს ჩვენ მოხსენების თარიღი. ჩვენ შეგვიძლია დაველოდოთ მხოლოდ და მხოლოდ ამ შემოთავაზებას და ჩვენ ვართ ნებისმიერ დროს მზად იმისთვის, რომ ვუმასპინძლოთ საქართველოს პრეზიდენტს“, - განაცხადა ირაკლი კობახიძემ.

ცნობისათვის, პარლამენტის რეგლამენტით, პრეზიდენტი უმაღლესი საკანონმდებლო ორგანოს წინაშე ყოველწლიური მოხსენებით საგაზაფხულო სესიის პირველივე კვირაში უნდა წარდგეს.