კონფლიქტის ზონა

ოკუპირებული ცხინვალის საავადმყოფოში დაკავებული საქართველოს მოქალაქე გარდაიცვალა

გუშინ ცხინვალის ერთ-ერთ საავადმყოფოში საქართველოს მოქალაქე არჩილ ტატუნაშვილი გარდაიცვალა, რომელსაც ბრალი ჰქონდა წაყენებული სამხრეთ ოსეთის მოსახლეობის ე.წ. გენოციდში. ამის შესახებ ადგილობრივი საინფორმაციო სააგენტო РЕС-ი წერს დე-ფაქტო სახელმწიფო უშიშროების კომიტეტის პრესსამსახურზე დაყრდნობით.

ე.წ. კომიტეტის ინფორმაციით, ტატუნაშვილი ახალგორში დააკავეს და ცხინვალში წაიყვანეს დაკითხვაზე, რომლის დროსაც გამომძიებლებმა მასალები წარუდგინეს, რომლითაც დასტურდება ტატუნაშვილის მონაწილეობა საომარ და სხვა უკანონო ქმედებებში.

„საკუთარ ბრალეულობაში დარწმუნების შემდეგ, ბრალდებული ჩაიკეტა და თარჯიმნისა და ადვოკატის გარეშე პასუხების გაცემაზე უარი თქვა, თუმცა მათი თანდასწრებით არ დაუწყია გამოძიებასთან თანამშრომლობა. ამის შემდეგ იყო მიღებული გადაწყვეტილება ტატუნაშვილის დროებითი მოთავსების იზოლატორში გადაყვანის შესახებ, თუმცა გადაყვანის პროცესში მან სცადა ერთ-ერთი გამცილებლის იარაღის დაუფლება. აღნიშნული მცდელობა იყო აღკვეთილი გამცილებლების საპასუხო ქმედებებით, რომლებმაც გამოიყენეს ფიზიკური ძალა და სპეციალური საშუალებები. წონასწორობის დაკარგვისას ტატუნაშვილი დაეცა კიბის საფეხურებზე, რის შედეგადაც ტრავმა მიიღო და ის საავადმყოფოში გადაიყვანეს“, - განაცხადეს ე.წ. სახელმწიფო უშიშროების კომიტეტში.

ე.წ. კომიტეტის პრესსამსახურის ცნობით, ტატუნაშვილს საავაადმყოფოში საჭირო სამედიცინო დამხარება გაუწიეს, თუმცა გარკვეული დროის შემდეგ ის გარდაიცვალა.

იმავე პრესსამსახურის ინფორმაციით, გაკვეთის შედეგად აღმოჩნდა, რომ გარდაცვალების მიზეზი გულის მწვავე უკმარისობა გახდა.

ე.წ. სახელმწიფო უშიშროების კომიტეტის პრესსამსახურზე დაყრდნობით გამოცემა წერს, რომ არჩილ ტატუნაშვილი 1983 წელს დაიბადა და ცხოვრობდა მცხეთაში. მათივე თქმით, ტატუნაშვილი ქართული სპეცსამსახურების ინფორმატორი იყო.

ანა მებურიშვილი