საზოგადოება

ომბუდსმენის განცხადებით, საქართველოში ფარმაცევტული ნარკომანია პრობლემაა

საქართველოს სახალხო დამცველის ნინო ლომჯარიას განცხადებით, საქართველოში ფარმაცევტული ნარკომანია პრობლემაა. როგორც ნინო ლომჯარიამ სახალხო დამცველის საპარლამენტო ანგარიშს წარდგენისას აღნიშნა, ამაზე არაერთი საერთაშორისო ორგანიზაციის დასკვნა არსებობს.

ლომჯარიას თქმით, დღეს არსებული რეპრესიული პოლიტიკა ძირითადად ნარკომომხმარებლების წინააღმდეგაა მიმართული და საჭიროა პრევენციისა და რეაბილიტაციის საკითხებზე ყურადღების გამახვილება.

„პრობლემას წარმოადგენს ნარკომანია საქართველოში. მომხმარებელთა რაოდენობა არის მაღალი. კუსტარულად დამზადებული ნარკოტიკების რაოდენობა ძალიან მაღალია. თუმცა მიგვაჩნია, რომ დღეს არსებული რეპრესიული პოლიტიკა ძირითადად მიმართულია ნარკომომხმარებლების წინააღმდეგ, მათი იდენტიფიკაციისკენ და ძირითადი რესურსი სწორედ მიემართება ნარკომომხმარებლების წინააღმდეგ საბრძოლველად.

საჭიროა, განსაკუთრებული ყურადღება მიმართული იყოს პრევენციისა და რეაბილიტაციის საკითხებზე. მიგვაჩნია, რომ მნიშვნელოვანია ის საკანონმდებლო ცვლილებები, რომელიც ინიცირებულია პარლამენტის მიერ. სახალხო დამცველი ამ თვალსაზრისით მხარს უჭერს შესაბამისი რეფორმის გატარებას, სადაც აქცენტები სწორედ პრევენციაზე და რეაბილიტაციაზე იქნება გაკეთებული”, – განაცხადა ნინო ლომჯარიამ.

ცირა გურგენიძე