საზოგადოება

ოქროს შუალედი უნდა ვიპოვოთ მოსახლეობის უსაფრთხოებასა და პირადი ცხოვრების უფლების დაცვას შორის - ეკა ბესელია

ე.წ. მოსმენების კანონზე მუშაობას პარლამენტში სამუშაო ჯგუფი მომავალი კვირიდან დაიწყებს.

როგორც პარლამენტის იურიდიულ საკითხთა კომიტეტის თავმჯდომარემ, ეკა ბესელიამ ჟურნალისტებს განუცხადა, საკონსტიტუციო სასამართლოს მიერ კანონში ცვლილებების შეტანის ვადად მიმდინარე წლის მარტამდე პერიოდი განსაზღვრა.

,,დეკემბერში უკვე ჩავატარეთ კვლევა, სხვა ქვეყნების მოდელები ვნახეთ. ახლა ვამუშავებთ სწორედ ამ მოდელებს. იანვარში ჩვენ სამუშაო ჯგუფს შევქმნით და ინტენსიურად ვიმუშავებთ ყველა დაინტერესებულ პირთან ერთად, რომ თებერვლისთვის ცვლილებები იყოს მზად.

საკონსტიტუციო სასამართლომ მარტამდე დააწესა ვადა, რომ ეს ცვლილებები მივიღოთ. ჩემი მთავარი გზავნილი არის, რომ ოქროს შუალედი ვიპოვოთ მოსახლეობის უსაფრთხოებასა და პირადი ცხოვრების უფლების დაცვას შორის. ამ შუალედში ვიქნებით სწორედ გადაწყვეტილების მიღების პროცესის დროს’’, - განაცხადა ეკა ბესელიამ.

ცნობისათვის, არასამთავრობო ორგანიზაციები ითხოვენ, რომ ე.წ. მოსმენების გასაღები სახელმწიფო უსაფრთხოების სამსახურიდან გამოვიდეს და დამოუკიდებელ ორგანოს გადაეცეს. მესამე სექტორში აცხადებენ, რომ სუს-იდან დამოუკიდებელი ორგანოში ე.წ. გასაღების გადატანა იქნება მეტი გარანტი, რომ მისი ფლობა არ გახდეს მისი ბოროტად გამოყენების შესაძლებლობა.

ნინო ექვთიმიშვილი