საზოგადოება

ორ დღეში გაგვცემენ პასუხს, რისი გაკეთება შეუძლიათ - „ბავშვთა სამყაროს“ დაზარალებული მოვაჭრეები კახა კალაძეს შეხვდნენ

„ბავშვთა სამყაროს“ ხანძრის შედეგად დაზარალებულები „ქართული ოცნების“ თბილისის მერობის კანდიდატ კახა კალაძეს შეხვდნენ.

მოლაპარაკებების დასრულების შემდეგ დაზარალებულმა მოვაჭრეებმა ჟურნალისტებს განუცხადეს, რომ მათ ორ დღეში გააგებინებენ, რა სახის დახმარებას შესთავაზებენ.

„ვფიქრობ, რომ კახა კალაძემ ჩვენი პრობლემები გულთან ახლოს მიიტანა. გვკითხა, რამდენია ზარალი. ხვალ გაესაუბრებიან ჩვენს ადვოკატებს. ორ დღეში გაგვცემენ პასუხს, რისი გაკეთება შეუძლიათ.

რვა თვეა ქუჩაში ვართ, ბანკების ვალები გვაქვს. ყველაფერი ავუხსენით, როგორც იყო. იმედი გვაქვს, რომ მერობის კანდიდატი ჩვენს პრობლემებს მოაგვარებს“,-განაცხადა ერთ-ერთმა დაზარალებულმა ინგა ლაცუზბაიამ.

შეხვედრის დაწყებამდე დაზარალებულმა მოვაჭრეებმა ჟურნალისტებს განუცხადეს, რომ მათი მთავარი მოთხოვნა ზარალის სრული ანაზღაურებაა. მათი ვარაუდით, სავაჭრო ცენტრში ხანძარი განზრახ გაჩნდა.

„ბავშვთა სამყაროში“ ხანძარი 30 იანვარს გაჩნდა, რის გამო თითქმის მთელი შენობა დაიწვა.