პოლიტიკა

პრაღაში დღეს აბაშიძე-კარასინის მორიგი შეხვედრა გაიმართება

პრაღაში დღეს რუსეთთან ურთიერთობების საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის შეხვედრა გაიმართება.

აბაშიძე შეხვედრაზე რამდენიმე საკითხის დაყენებას გეგმავს, მათ შორისაა 2011 წელს დადებული საბაჟო მონიტორინგის შესახებ შეთანხმება, რომელიც გულისხმობს საბაჟო კორიდორების ნეიტრალური მონიტორების მიერ გაკონტროლებას და რომელზეც ხელი რუსეთს ჯერ არ მოუწერია.

როგორც ზურაბ აბაშიძემ პრაღაში გამგზავრებამდე განაცხადა, ქართული მხარე საკითხთან დაკავშირებით შეხვედრაზე პოზიციების დაზუსტებას შეეცდება.

„შევეხებით ჩვენ 2011 წლის შეთანხმებას საბაჟო მონიტორინგის შესახებ, შევეცდებით გავარკვიოთ მათი პოზიცია. მოგეხსენებათ, ქართულმა მხარემ დეკემბერში გააფორმა კონტრაქტი, შვეიცარიულ კომპანიასთან, დავაზუსტებთ რუსეთის პოზიციას. იქ არის კითხვები და შევეცდებით მოვისმინოთ, რა აქვთ მხედველობაში. ჩვენი მხრიდან ყოველთვის კეთდება აქცენტი იმ ვითარებაზე, რომელიც შექმნილია ოკუპირებულ ტერიტორიებზე, საოკუპაციო ხაზზე,“ - განაცხადა ზურაბ აბაშიძემ.