პოლიტიკა

პრეზიდენტი ამ ფაქტს საქართველოს ტერიტორიის ანექსიისკენ გადადგმულ კიდევ ერთ ნაბიჯად აფასებს - ეკა მიშველაძე

საქართველოს პრეზიდენტი ეხმიანება რუსეთის სახელმწიფო დუმის თავდაცვის კომიტეტის მიერ, ოკუპირებულ აფხაზეთთან ე.წ. ჯარების გაერთიანებული დაჯგუფების შექმნის შეთანხმების რატიფიცირების მხარდაჭერას.

შესაბამისი განცხადება პრეზიდენტის პრეს-სპიკერმა, ეკა მიშველაძემ დღევანდელ ბრიფინგზე გააკეთა.
,,გვსურს გამოვეხმაუროთ რუსეთის სახელმწიფო დუმის თავდაცვის კომიტეტის მიერ, ოკუპირებულ აფხაზეთთან ე.წ. ჯარების გაერთიანებული დაჯგუფების შექმნის შეთანხმების რატიფიცირების მხარდაჭერას.

მოგეხსენებათ, ეს მოსკოვსა და სოხუმის ე.წ. ხელისუფლებას შორის, 2015 წელს ხელმოწერილი დოკუმენტის თანამდევი პროცესის გაგრძელებაა. რეალურად კი, ეს არის ქმედება, რომელიც მიზნად ისახავს, რუსეთის საოკუპაციო ჯარების აფხაზეთში ლეგალიზებას.

პრეზიდენტი გმობს ამ ფაქტს და მას საქართველოს ტერიტორიის ანექსიისკენ გადადგმულ კიდევ ერთ ნაბიჯად აფასებს, რაც პრეზიდენტის აზრით, საფრთხეს უქმნის არა მარტო საქართველოს სუვერენიტეტს, არამედ რეგიონში მშვიდობისა და სტაბილურობის შენარჩუნებას. პრეზიდენტი საერთაშორისო თანამეგობრობას რეაგირებისკენ მოუწოდებს’’, - განაცხადა ეკა მიშველაძემ.

ნინო ექვთიმიშვილი